Ajénsia Kooperasun vizita Timor-Leste atu aumenta traballadór timoroan servisu iha Japaun
DILI, 26 Outubru 2026 (TATOLI)—Sekretária Estadu Formasaun Profisionál no Empregu (SEFOPE) akompaña Ajénsia Kooperativa Japaun, halo observasaun ba fasilidade ba aprendizajen iha sentru formasaun Tibar nomós iha eskoka téknika vokasionál Bekora, ho objetivu atu aumenta númeru traballadór timoroan ba servisu iha Japaun.
Asesór iha Sekretária Estadu Formasaun Profisionál no Empregu, Elídio Ximenes, hateten atividade vizita ne’e mak lori kompañia husi Japaun ne’ebé halo rekrutamentu ba traballadór timoroan sira ba observa kondisaun konkreta iha fatin sentru formasaun Tibar, nune’e rekomenda ba SEFOPE atu kontinua Eleva lian Japaun hodi aumenta númeru traballadór.
“Hafoin lori emoregadór sira ba vizita sentru ne’e sira interesante hakarak aumenta númeru traballadór, tanba tuir sira fasilidade sufisiente ona maibé presiza kapasita lian Japaun,” Asesór SEFOPE ne’e hateten ba Agência Tatoli, liuhusi telefónika, ohin.
Nia dehan, atu prienxe rekezitu ba kapasitasaun lian Japaun, SEFOPE mós halo ona akordu ho Ministériu Edukasaun hodi integra lian Japaun iha kurríkulu eskolár liuliu ba eskola téknika vokasionál sira.
“Kona-ba prosesu rekrutamentu nian traballadór na’in-ualu mak pasa no daudaun ne’e sira tuir hela formasaun lian Japaun no kultura Japaun durante fulan-neen molok dezloka ba Japaun,” nia informa.
Nia hatutan, Ajéncia Kooperativa SOSHIJI sei rekruta traballadór mane na’in-ualu ba empreza haat, kada empreza presiza ema na’in-rua iha setór konstrusaun no kompañia sira mak hanesan Omura Suishin-Nagasaki, Matsunaga Kensetsu-Oita, ON-Fukuoka no Hoshin Kensetsu-Fukuoka.
“Tanba ne’e, sira rekomenda ita kona-ba lian Japaun, saúde no fíziku, atu nune’e bainhira sira atu aumenta númeru traballadór, ita-nia rekursu iha ona atu compete,” nai hateten.
Iha biban ne’e, nia hatutan, sira halo vizita ba iha eskola téknika vokasionál Bekora hodi observa sira-nia fasilidade ba prosesu aprendizajen nian.
“Nune’e sira rekomenda eskola sira-ne’e labele halo prátika estájiu profisionál iha de’it instituisaun públiku no privadu sira, maibé mellora fó espasu ba sira mós atu aprende iha sentru formasaun, tanba sira iha fasilidade ne’ebé sufisiente,” nia dehan.
Jornalista : Alexandra da Costa
Editór : Cancio Ximenes
