Família simu saudozu Sebastião Gomes nia restu mortál ho matan-been

DILI, 27 Outubru 2026 (TATOLI)—Komité 12 Novembru hamutuk ho sobrevivente 28 Outubru halo ona transladasaun saudozu Sebastião Gomes nia restu mortál ba rezidénsia iha Vila Verde no familia simu ho matan-been.

Transladasaun ne’ebé hala’o iha tersa (27/10) ne’e, hahú husi kapela Pai Nosso iha Semitériu Santa Cruz ba rezidénsia Vila Verde durante oras rua nia laran, hafoin  família sei entrega ba Komite 12 Nvembru no sei lori ba Igreja Motael hodi halo omenajen ofisial husi órgaun Estadu no organizasaun sira seluk.

Notísia Relevante: Sebastião “Loriku Rai Na’in” La Fó Fatin Ba “Garuda”

“Durante tinan 35 to’o agora, matebian nia ruin ita kee iha hodi bainruak tanba matebian nia  rate ka fatin izoladu loos. Ita hotu haree katak dalan tama ba matebian nia rate ne’e oinsá, entaun ita haree no rona katak nia naran boot maibé nia fatin ladun di.ak. Entaun, ida-ne’e ami preokupa no jerasaun foun sira ne’eb’e mai ne’e sei la koñese, tanba saudozu ne’e koñesidu no nia lori misaun boot ida hodi luta iha situasaun difisil tebes iha momentu ne’eba, to’o ohin loron ita bele ukun an,” Prezidente Komite 12 Novembru, Grigório Saldanha, hateten ba jornalista sira iha Vila Verde, ohin.

Nia dehan, Komité 12 Novmbru momntu ne’eba hamriik tan hodi protesta okupasaun Indonézia tanba matebian ema oho ne’e liga ba funu ne’ebé iha, no problema sira  violasaun direitu umanu barak no aspirasaun povu nian ba indepedénsia nian ne’e boot tebes.

“Entaun, Saudozu Sebastião mate provoka ema barak mate tan, entaun nia so folin ba libertasaun Timor-Leste ba sakrifisiu sira-ne’e, ema terus, ema tama kadeia. Entaun, ida-ne’e favór troka independénsia, nune’e nia valór boot no nia labele hakoi iha fatin izoladu no ikus mai Governu liuhusi Minsitériu Antigu Kombatente Libertasaun Nasionál fó  fiar ba Komité 12 Novembru no komité koordena ho sobrevivente 28 Outubru sira ho familia konkorda hodi tau ba fatin di’ak,” nia dehan.

Komité 12 Novembru ba to’o iha Vikeke Uaimori, familia hotu konkorda katak tenke muda saudozu nia kampa ne’e muda mai oin, nune’e eleva ninia  estatutu hanesan kombatente ne’ebé merese hetan fatin espesiál iha semitériu Santa Cruz, nune’e laiha ema ida haluha tan ninia istória sira luta ba libertasaun nasionál ne’e.

Iha fatin hanesan, Reprezentante Familia Saudozu Sebastiao Gomes, Moises Rangel, sente triste tanba lakon ona saudozu Sebastião ne’ebé mak inan-aman hadomi no nia oan mesak to’o lakon vida ba rai ida-ne’e.

“Agradese ba Estadu no juventude sira muda ona nia rate no vizita hodi fó valorizasaun ba saudozu Sebastião Gomes liuliu estudante sira bele hatene saudozu ne’e. Ami kontente tanba Estadu muda ona nia rate mai oin,” nia hateten.

Saudozu Sebastião Gomes nia kolega ida, Waldemar da Conceição Silva, hateten hanesan kolega iha trajédia 28 Otubru 1991 ne’eb’e akontese iha Igreja Motael, banhira nia mate sente triste tebes tanba nia ne’e ema di’ak tebes.

“Ha’u sente triste, momentu ne’eba tanba nia ema di’ak, nia liga ba ema hotu no halo amizade ba hotu-hotu. Entaun, nia ne’e valór tebes ba nasaun ne’e tanba husi nia mak ita ohin loron indepedénsia. Se la’os nia, ita sei iha prosesu naruk ida,” Waldemar da Conceição informa ba jornalista sira.

Entretantytu, Nevio Sarmento hateten iha momentu 28 Outubru ne’e iha asaltu ida hodi Sebastião mate, entaun saudozu nia kontribuisaun mak fanu juventude hotu iha Dili hamriik hodi halo demonstrasaun iha 12 Novembru, depois nia ai-funan moruk mak Indonézia mai tiru iha ne’e hodi ema balun mate tan iha ne’e.

“Sebastião hela iha Vila Verde hamutuk ho ha’u, ami vizinhu. Nia ema-ne’ebé mak di’ak tebes. Depois iha momentu akontese ida-ne’e, ha’u sei lembra nia hanesan ema ida-ne’ebé mak nonook, nunka koa’lia arbiru no liga ema hotu. Ami iha grupu laiha intensaun aat ba malu, ami buka massa hamutuk hodi haree nasaun ba oin,” nia esplika.

Entertantu, tuir ajenda ne’ebé mak iha katak saudozu Sebastião nia ruin sei translada mai iha Igreja Motael iha tuku 16h00 to’o 16h15 hodi fó omenajen ofisial husi Prezidente Repúblika, iha tuku 16h15 to’o 16h30, husi Prezidente Parlamentu Nasionál no bankada parlamentár sira iha tuku 16h30 to’o 17h00.

Primeiru-Ministru no membru Governu sira sei fó omenajen iha tuku 17h15 to’o 17h30, Preziente Tribunal Rekursu ho Juizes sira iha tuku 17h30 to’o 17h45,  Prezidente CCLN no estrutura iha tuku 17h45 to’o 18h00, husi F-FDTL iha tuku 18h00 to’o 18h15, husi PNTL iha tuku 18h15 to’o 18h30

Sekretáriu Jerál Juventude FRETILIN ho estrutura iha tuku 18h30 to’o 18h45, Koordenadór Nasionál Juventude CNRT ho estrutura iha tuku 18h45 to’o 19h00, Prezidente Juventude Partidu PD ho estrutura iha tuku 19h00 to’o 19h15, Koordenadór/Prezidente Juventude PLP ho estrutura iha tuku 19h15 to’o 19h30, Prezidente/Koordenadór Juventude KHUNTO ho Estrutura iha tuku 19h30 to’o 19h45, sosiedade sivil sira no públiku iha tuku 19h45-20h00.

Notísia Relevante: MAKLN sujere muda saudozu Sebastião Gomes nia rate ba portaun oin

Jornalista : Felicidade Ximenes

Editór        : Cancio Ximenes