EDTL asina kontratu ho empreza 17 hodi fornese eletrisidade ba aldeia 25

DILI, 29 Outubru 2026 (TATOLI)–Eletrisidade de Timor-Leste, Empreza Públika (EDTL, E.P) asina kontratu ho empreza 17 atu hala’o ba Projetu Eletrifikasaun Nivel Aldeia, hodi fornese liña eletrisidade ba aldeia 25 iha territóriu nasionál.

Asinatura akordu ne’e asina husi Prezidente Komisaun Ezekutiva, EDTL, E.P, Paulo da Silva, ho empreza manán-na’in sira, ho sasin husi Sekretáriu Estadu Eletrisidade, Água no Saneamentu, Santos Noronha, no Ministru Obra Públika, Samuel Marçal.

Prezidente Komisaun Ezekutiva, EDTL, E.P, Paulo da Silva, esplika katak projetu eletrifikasaun iha nivel aldeia, faze daruak nian hamutuk pakote 34, ne’ebé pakote 17 asina ohin, pakote haat re-tender no pakote 13 iha prosesu avaliasaun no espera seman ida ka rua bele konklui, nune’e asina tan kontratu.

“Pakote 17 ne’e nia orsamentu hamutuk millaun $2-resin, no sei kobre aldeia hamutuk 25. Nune’e, ita hein katak iha semana ida ka rua mai, ita bele konklui tan prosesu asinatura ba pakote sira seluk atu atinje Governu nia objetivu, katak iha tinan ida-ne’e ita bele kompleta eletrifikasaun ba aldeia hotu”, Paulo da Silva hatete.

Nia salienta katak maski projetu sira ne’e la’ós obra ho orsamentu boot, tanba valór másimu rihun $300-resin no balun hetan rihun $100-resin, maibé husi obra ki’ik hirak ne’e kria relasaun entre setór privadu no Governu.

“Tanba ne’e, ita hein katak empreza sira-nia serbisu sei prodús rezultadu di’ak, nune’e ita hotu bele atinje objetivu komún, mak lori benefísiu ba populasaun. Atu atinje objetivu ne’e, ha’u husu ba empreza hotu atu fó atensaun ba implementasaun projetu no aselera serbisu tuir kalendáriu ne’ebé determina ona”, nia dehan.

Ministru Obra Públika, Samuel Marçal, hatete relasiona ho asesu eletrisidade ba nivel suku hela de’it mak aldeia kuaze 100-resin mak seidauk, maibé prosesu nafatin kontinua no to’o meadu 2027 aldeia hothotu asesu ona ba liña eletrisidade.

“Tanba ne’e, ita bele dehan katak iha tinan 2027, eletrisidade bele to’o ona iha territóriu tomak Timor-Leste. Se iha uma-kain balun ne’ebé hela iha fatin dook ka susar atu asesu, rede eletrisidade la konsege to’o, ita sei buka solusaun liuhusi instalasaun painél solár. Ita hein katak iha tinan 2027, povu hothotu, inklui komunidade ki’ik sira ne’ebé hela iha foho no área rurál, bele asesu ba eletrisidade”, nia dehan.

Governu iha polítika atu fó oportunidade ba setór privadu, nune’e bele dezenvolve no investe liután. Aleinde ne’e, hakarak atu kria ambiente ne’ebé permite empreza sira investe sira-nia kapital, aumenta kapasidade no kontribui ba dezenvolvimentu ekonómiku país.

“Ita hotu iha responsabilidade atu dezenvolve ita-nia rai. La’ós Governu mesak mak bele halo ida-ne’e. Setór privadu mós tenke partisipa, fó kontribuisaun no serbisu hamutuk ho Governu atu dezenvolve infraestrutura no setór sira seluk”, nia salienta.

Tuir nia, iha projetu infraestrutura sira, empreza lokál tenke aproveita oportunidade atu partisipa no hatudu kapasidade.

“Governu hakarak fó korajen ba imi hotu, atu ita bele serbisu hamutuk, ajuda malu no harii relasaun serbisu ne’ebé forte entre Governu no setór privadu. Iha komunidade, tenke aproveita oportunidade serbisu ne’ebé Governu fó. Oportunidade ne’e importante atu imi bele hatudu kapasidade, responsabilidade no konfiansa iha serbisu”, nia hatete.

Na’in ba empreza Luanira, Unipessoal Lda., joint venture Com Geno Leo, Unipessoal Lda., Julião da Costa, agradese ba Governu ne’ebé fó fiar ba nia iha projetu eletrifikasaun ba nivel aldeia no garante katak ei halo serbisu skualidade no terminan tuir tempu.

“Ba ha’u-nia kontratu, ha’u kona iha aldeia Atara, husi munisípiu Ermera, durante tempu fulan neen. Ha’u garante serbisu tuir tempu ne’ebá iha”, nia asegura.

Jornalista: Arminda Fonseca 

Editora: Maria Auxiliadora