INFPM: Ai-moruk Kontainer haat iha ona Portu Tibar
DILI, 11 Novembru 2026 (TATOLI)—Diretór Ezekutivu INFPM, Paulina Mendonça, hateten reajentes ne’ebé menus iha Laboratóriu Nasionál Saúde mak daudaun ne’e INFPM sei rezolve iha tempu badak, tanba ai-moruk no reajentes sira iha kontainer haat iha ona Portu Tibar.
Nia dehan, ai-moruk hirak ne’e sei halo distribuisaun ba Laboratóriu Nasionál nomós Hospitál Nasionál Guido Valadares nomós fasilidade saúde sira hotu iha Timor-Leste.
“Agora daudaun ai-moruk kontainer rua mak tama mai depois ba konsumaves reajentes agora daudaun tama mai ona. Ai-moruk kontainer rua no Konsumaveis kontainer rua, iha 16 Novembru, sasán sei tama mai kontainer haat no sasán balun sei iha Portu Tibar. Agora daudaun prosesu hela iha alfadegamentu no bainhira sasán aprova mak sasán bele sai,” Paulina Mendonça hateten ba Jornalista sira iha nia kna’ar fatin, ohin.
Nia esplika, sasán iha Portu Tibar ne’e tama mai bele minimiza ona estoke sira-ne’ebé mak daudaun ne’e laiha, tanba ne’e bainhira sasán sira-ne’e tama iha armazen sentrál mak sei distribui ba ospitál munisipiu sira no ospitál referal sira inklui HNGV.
Nia dehan, kona-ba kandidatu sira-ne’ebé mak tuir vaga husi Hospitál Nasionál Guido Valadares, INFPM halo kompras tuir lista kuantifikasaun ne’ebé iha planu.
“Iha semana ida ne’e nia laran vaga ne’ebé mak HNGV loke, buat hotu-hotu tuir lista kuantifikasaun no tuir planu no mós servisu ne’ebé HNGV la’o ona, ne’ebé INFPM toma responsavél ba kompras reajentes sira-ne’e, INFPM buka meu rezolve ona. Foin dadauk ita dada husi munisipiu mai tama ida-ne’e INFPM nia servisu no reajentes ne’ebé iha munisipiu la uza, ita dada mai para hamenus nia expire. Depois vaga ne’ebé kauze 2000 pesoa ne’ebé tuir teste laboratóriu ne’e prosesa hela,” nia esplika.
Nia haktuir, kona ba estoke ai-moruk ne’ebé mak disponivél agora dadauk ba iha 79% no estoke out agora 21%, maibé daudaun sasán iha Portu Tibar no iha tempu badak sei tama iha armazen sentrál.
“Ai-moruk iha HNGV estoke hotu ami rezolve, buka meu oinsá atu rezolve problema ne’ebé HNGV hasoru no ami responde ona. No, aimoruk estoke out mka 21% no disponivel 79%, vital 18%, esensial 17% no nesesariu 37%,” nia haktuir.
Antes ne’e, Diretór Jerál iha Laboratóriu Nasionál, Mario Coilho, hateten Laboratóriu Nasionál enfrenta hela falta reajentes ba teste raan kimika no hematolojia, maibé Laboratóriu Nasionál halo ona komunikasaun Servisu Saúde Munisípiu Ermera ho Ospital Referal Maubisse apoiu ona 400 hodi halo teste ba kandidata sira-ne’ebé mak tuir vaga kareira espesializada husi Hospital Nasionál Guido Valadares.
Jornalista : Felicidade Ximenes
Editór : Cancio Ximenes
