DILI, (TATOLI) – Institutu Camões-IP no União Europeia (UE) iha Timor-Leste (TL) aprezenta fundu ho valór dolár milloen 12, rihun 600 (USD 12.600.000,00) ba Timor-Leste hodi reforsa planeamentu, jestaun, auditoria, monitória, responsabilizasaun no supervizaun ba uzu finansa públika, hodi hetan prestasaun servisu ida di’ak liu.
“Área seluk, nu’udar kooperasaun portugeza ami apoiu iha formasaun língua ba profesór sira iha CAFÉ, eskola portugeza, projetu Formar mais ho INFORDEPE”, haktuir vise-prezidente Camões, Gonçalo Teles Gomes, ba ajénsia TATOLI iha otel Timor, ohin.
CAFÉ ne’e katak Centros de Aprendizagem e Formação Escolar no INFORDEPE (Instituto Nacional de Formação de Docentes e Profissionais da Educação).
“Alende ida ne’e, ami iha projete boot kona-ba dezenvolvimentu agrikulturál. Ami mós termina dadauk hela, iha ámbitu rekonstrusaun pouzada iha Maubara (Liquiça) no sei entrega iha fulan hirak tuir mai ba governu Timor-Leste”, tenik vise-prezidente Camões.
Nune’e mós iha área justisa, liliu kapasitasaun ba polísia sira. “Purtantu, atividade kooperasaun ida ne’ebé luan tebes, nomós iha saúde, iha komunikasaun sosiál.
Tanba ne’e, kooperasaun portugeza dinámika tebes iha setór oioin”, haktuir.
Área temátika haat ne’ebé sai hanesan komponente Institutu Camões mak fiskalizasaun finanseira, auditória finanseira, kriminalidade ekonómiku-finanseira no kontrolu sosiál ho destinu ba orgaun komunikasaun sosiál sira iha Timor-Leste.
To’o ohin loron, Instituto Camões no UE promove ona atividade no projetu oioin iha Timor-Leste, hodi fó apoiu no asisténsia ba setór oioin iha sosiedede timorense.
Enkuantu, xefe delegasaun UE, embaixadór Alexandre Leitão, afirma fundu pursentu 95 husi EU no pursentu lima husi Camões ne’e sei implementa husi Institutu Camões-IP, Portugal.
“Ami-nia espetativa ne’e mais alta posível. Hanesan ami hateten tiha ona, bainhira hahú halo diskusaun hateten, ami iha ne’e la’ós ko’alia kooperasaun maibé halo kooperasaun. Agora kooperasaun ne’e, ho périodu tinan lima, hodi hadi’a instituisaun Timor-Leste nian”, dehan embaixadór Alexandre Leitão perante profisionál komunikasaun sosiál sira.
Entretantu iha atividade aprezentasaun fundu ne’e marka prezensa no husi reprezentante oradór nasionál Timor-Leste nian, hanesan Parlamentu Nasionál, Sekretária Estadu Prezidénsia Konsellu Ministru no Komunikasaun Sosiál, Unidade Auditória Sosiál.
Inklui, Komisaun Anti-Korupasaun, Polísia Sientífika Investigasaun Kriminál, Inspesaun Jerál Estadu nian, Tribunál Rekursu/Câmara de Contas, Prokuradória Jerál Repúblika nian no FONGTIL, inklui mós Embaixadór Portugal, José Pedro Machado.
Jornalista: Rafy Belo
Editora: Rita Almeida
