DILI, 05 outubru 2022 (TATOLI)–Vise-Primeiru-Ministru no Ministru Planu no Ordenamentu (MPO), José Maria dos Reis, kuarta ne’e, aprezenta ona opsaun polítika-lejizlativa subjasente sira ba projetu kona-ba Lei Kuadru Planeamentu Estratéjiku, iha reuniaun Konsellu Ministru (KM), kuarta ne’e.
“Opsaun sira ne’ebé aprezenta ne’e ho objetivu atu regula planeamentu estratéjiku hanesan funsaun bázika hosi Estadu no hanesan sistema planeamentu ekonómiku no sosiál integradu ba prazu naruk, médiu no prazu badak,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: Governu halo reajustamentu PED 2011-2030 hodi re-define metas
Nia dehan, inisiativa ne’e atu promove kreximentu no dezenvolvimentu ekonómiku no sosiál sustentável, orienta atividade no investimentu públiku, orienta ho modu jerál no indiretu, setór privadu no kooperativu no asegura jestaun públika ida ho objetivu no rezultadu sira tuir kritériu efisiénsia, efikásia no efetividade.
“Ne’e foin mak foin opsaun polítika-lejizlativu maibé ne’e asuntu prioridade iha governasaun Primeiru-Ministru, Taur Matan Ruak nian, tanba ne’e maka ho Vise Primeiru-Ministru no ha’u rasik ami halo diskusaun,” nia tenik.
Ho ida ne’e, Governu iha ona hanoin iha loron 14 outubru sei realiza retiru ne’ebé sei partisipa hosi membru governu tomak hodi analiza opsaun hirak ne’e, liuliu kona-ba Planu Estratéjiku Dezenvolvimentu (PED) no ninia mekanizmu ba planu ne’e rasik.
Jornalista : Antónia Gusmão
Edirora : Julia Chatarina
