MALIANA, 11 abríl 2023 (TATOLI) – Autoridade Protesaun Sivíl liuhosi Diresaun Nasionál Prevensaun Konflitu Komunitária (DNPKK), tersa ne’e realiza kampaña promove dame ho símbolu husik manu-pombu semo atu hatudu dalan ba dame, hatutan ita-nia lian dame malu ba estudante no grupu arte-marsiál sira-ne’ebé eziste iha munisípiu Bobonaro.
Komandante Operasaun APC iha munisípiu Bobonaro, Inspetór Polísia José Lelo Bere, esplika, objetivu hosi atividade ne’e atu hamutuk haburas, hametin unidade, amizade, fraternidade hodi kontribui ba estabilidade no dezenvolvimentu nasionál.
Notísia relevante: DNPKK fasilita asaun dame ba kazu konflitu iha Raifun Bobonaro
“Ita-nia serimónia ida-ne’e importante tebes, tanba iha tinan kotuk ita hala’o tiha ona asaun dame, maibé situasaun balu sei akontese iha bairru-bairru sei akontese tuda-malu, ne’ebé ha’u husu ba ita hotu atu kria pás iha ita-nia aldeia mai to’o suku,” nia hateten iha intervensaun ba atividade ne’ebé realiza iha Jináziu Maliana.
Repzentante Prezidente Autoridade Munisípiu Bobonaro, Egídio Mai Siga, apela ba estudante liuliu grupu arte-marsiál sira atu prepara mentadalidade no kreatividade iha arte hodi kontribui ba hamenus krime iha munisípiu refere.
“Ita halo problema, ida ba Santa Cruz, ida ba justisa hasoru prizaun, kuandu mosu ida-ne’e ida mate família lakon barak, tama kadeia mós família lakon, ne’ebé ha’u husu ita ita-boot sira asegura estabilidade no pás iha ita-nia rai, tanba ita sira ne’e la seluk la leet ida, mesak família de’it,” atuál Diretór Ajénsia Fiskalizasaun Munisipál Bobonaro ne’e katak.
Komandante PNTL Munisípiu Bobonaro, Superintendente Xefe Antoninho Mauluta, enkoraja koordenadór grupu arte-marsiál sira orienta membru sira apoia autoridade seguranaa hodi asegura situasaun hakmatek iha munisípiu Bobonaro nune’e bele fó biban ba sidadaun hotu halo idak-idak nia atividade ho di’ak.
“Ha’u hatene arte-marsiál nu’udar atividade ezersísiu ka jimnástika ida oinsá ema idak-idak atu hadi’ak nia saúde tantu fízika no mentalidade, entaun uza arte atu halo defeza pesoál la’ós halo problema,” nia katak.
Vise-Prezidente Konselu Veteranu Munisípiu Bobonaro, Lúcio Dinis Marques ‘Onsar’, apela membru grupu arte-marsiál sira presiza banati tuir espíritu patriotizmu no nasionálizmu ne’ebé eroi sira husik hela hodi kontribui ba dezenvolvimentu nasionál.
“Ami katuas hotu ona, ami uluk luta ba independénsia rai ida-ne’e atu imi moris livre ba mai, agora ita-boot sira mak hanesan jerasaun foun ba rai ida-ne’e, tenke kontinua luta ne’ebé ita-nia erói sira husik hela atu hadi’ak ita-nia rai sai di’ak liután,” veteranu ne’e apela.
Prezidente Persaudaraan Setia Hati Terrate (PSHT), munisípiu Bobonaro, Americo de Jesus, agradese ba APC ne’ebé mak iha inisiativa di’ak hodi realiza atividade dame ne’e.
“Ami sente atividade ne’e kapás la halimar, tanba liu hosi asaun ida-ne’e, ba oin bele fó liman ba malu ho maun-alin sira hosi arte-marsiál sira seluk, atu kria pás no estabilidade iha munisípiu Bobonaro ida-ne’e,” nia fó hanoin.
Xefe estrutura disiplinár grupu arte-marsiál Ikatan Kera Sakti (IKS), munisípiu Bobonaro, Feliçiano dos Santos, sente kontente tanba durante ne’e sira hein hela governu atu realiza atividade ne’e.
“Ami durante ne’e hosi IKS, PSHT, 77, Koliamu no KORK hasoru dezafiu, tanba ami-nia alin sira halo problema ema sempre ko’alia mak organizasaun nia naran, iha biban asaun promove dame ida-ne’e bele loke ona joven hotu-hotu nia hanoin. Ba oin saida mak ami bele halo no kontribui ba pás no estabilidade iha munisípiu Bobonaro,” nia katak.
Partisipa iha atividade ne’e komposta hosi administradór postu administrativu Maliana, Tomás Laco-Loi, Prezidente Sub-Komisaun Reguladora Arte-Marsiál, munisípiu Bobonaro, José Ramos, Diretór CNE Munisípiu Bobonaro, Juvito Ramos, membru IKS-PSHT no reprezentante Kolimau 2000.
Notísia relevante: IKS, PSHT no Kolimau 2000 sei apoia PNTL Bobonaro garante pás iha kampaña eleitorál
Jornálista : Sérgio da Cruz
Editór : Evaristo Soares Martins
