BOBONARO, 10 dezembru 2022 (TATOLI)–Autoridade Protesaun Sivil liuhosi Diresaun Nasionál Prevensaun Konflitu Komunitáriu (DNPKK), sesta (09/12), fasilita asaun dame malu entre família no juventude Grupu Arte-Marsiál (GAM) ho Grupu Arte-Rituál (GAR) sira ne’ebé envolve iha kazu konfrontu ne’ebé akontese iha suku Raifun, postu administrativu Maliana, munisípiu Bobonaro hodi rezulta ema ida kanek inklui uma ida no sasán balun hetan estragu.
Diretór Nasionál Prevensaun Konflitu Komunitáriu, António Viegas, agredese ba família no lia-na’in sira iha suku Raifun, ne’ebé iha ona inisiativa di’ak hodi halibur malu ho juventude sira atu buka solusaun ba problema ne’ebé akontese, tanba liuhosi meiu sira ne’e maka bele hamenus konflitu iha fatin-fatin.
“Nasaun ida atu forte no dezenvolvimentu la’o ho di’ak tenke iha dame, entaun dame tenke hahú hosi uma laran, aldeia, suku to’o munisípiu, atu nune’e dezenvolvimentu sei la’o maka’as no investidór rai-li’ur sei mai investe, maibé importante mak kria pás, estabilidade no persiza Bobonaro-oan sira-nia kontribuisaun atu dezeña dezenvolvimentu di’ak ba Bobonaro,” refere nota imprensa ne’ebé Agência Tatoli asesu, sábadu ne’e.
Notísia Relevante: DNPKK-Belun kapasita autoridade lokál no OPS ba prevensaun konflitu
Tuir kronolojia, konfrontu akontese iha loron 22 setembru 2022, maizumenus tuku 01:30 madrugada iha serimónia divertimentu ba enserramentu verifikasaun dadus kombatente libertasaun nasionál iha suku Raifun.
Mosu dezentendimentu entre família rua hosi jerasaun uma lisan ida nian, hafoin hada’et to’o iha juventude sira hosi GAM ho GAR sira iha suku Raifun.
Nune’e, ho situasaun konflitu ne’ebé laiha solusaun, ekipa mediadór DNPKK munisípiu Bobonaro diretamente fasilita mediasaun no asina akordu dame malu nu’udar parte ida atu kria fali relasaun di’ak no situasaun hakmatek entre família, GAM bo GAR sira.
Líder DNPKK konsidera konflitu ninia impaktu boot ba ema-nia vida, liuliu hasoru ospitál, kadeia no mate.
“Husu ba alin sira tenke hadook-an hosi konflitu no foku ba dezembolvimentu,” António Viegas apela ba joven sira.
Notísia Relevante: DNPKK esforsu rekonsilia joven iha área risku ba konflitu
Iha fatin hanesan, Xefe suku Raifun, Domingos Salvador, apela ba joven sira ne’ebé envolve iha organizasaun GAM ho GAR sira atu hakribi ba violénsia no konflitu.
“Joven sira atu envolve grupu arte-marsiál no arte-rituál ne’e ema ida-idak ninia direitu, maibé tenke hapara ona konflitu atu kria nafatin amizade no unidade hodi kontribui ba pás no estabilidade hahú agora no ba futuru iha suku Raifun,” nia fó hanoin.
Mediasaun no asaun dame ne’e partisipa hosi Administrador postu Maliana, Tomas Lacu-Loe, Autoridade Protesaun Sivil munisípiu Bobonaro, Reprezentante Komandante Polísia Nasionál Timor-Leste (PNTL) munisípiu Bobonaro, veteran sira, Komisaun Regularora Arte-Marsiál (KRAM) munisípiu Bobonaro, autoridade lokál inklui entidade relevante seluk.
Jornalista : Sérgio da Cruz
Editora : Julia Chatarina
