VIQUEQUE, 21 jullu 2023 (TATOLI)—Koordenadora Kooperativa Kréditu Tane Malu (CCTM, sigla portugés) iha suku Uma Uain Kraik, postu administrativu Viqueque Vila, munisípiu Viqueque, Jelaurina Nunes Fernandes, preokupa ho produtu lokál ne’ebé ladún folin, tanba ne’e nia husu Governu atu kria merkadu.
“Husu ba Governu atu tau matan ba produtu lokál no kria merkadu ida di’ak hodi motiva kooperativa sira hasa’e produsaun nune’e labele dependénsia ba produtu importasaun sira. Ita garantia hela tanba ita-nia nuu barak, maibé ema ladun halo produsaun tanba liga mós ba merkadu,” Koordenadora kooperativa hateten iha sede kooperativa CCTM, suku Uma Uain Kraik, sesta ne’e.
Aleinde ne’e, nia mós husu ba Governu atu kria laboratóriu hodi halo teste amostra mina ne’ebé prodús iha rai-laran tanba daudaun iha Timor seidauk iha laboratóriu, nune’e tenke lori amostra bá Indonézia hodi bele halo teste ba mina nia kualidade, ijene no prazu.
Notísia relevante : Kooperativa Hamaifor prodús mina-sona iha Viqueque
CCTM daudaun ne’e prosesa nuu sai mina nuu ho marka minuvi inklui prodús mós produtu seluk.
“Ami prodús mina hahú fulan-janeiru to’o jullu hamutuk litru 150 hodi fa’an ba konsumidór sira ho presu litru 1 $1,2 no litru 5 $10. Ami mós prodús rebusadu uza ailia toples 30 hodi hatama hela ba loja sira iha Dili hodi halo promosaun ba ami-nia produtu lokál ne’e,” nia akresenta.
Membru kooperativa sira sosa nuu maran hosi grupu agrikultór sira, fuan ida ho presu $0,20 hodi prodús mina nuu, maibé daudaun folin mina tun litru 5 $10, enkuantu tempu uluk bainhira mina importasaun la tama, litru 5 ho presu $12.
“Ami prefere Governu haree taxa importasaun mina nian atu ita-nia produtu lokál hanesan mina nuu bele folin, tanba agora ita-nia nuu barak, maibé ema ladun sosa tanba mina importasaun kada litru 5 ho presu $8, entaun ema sosa mak mina importasaun. Ami-nia membru maioria feto. Ami ladun satisfas ho presu mina iha merkadu, maibé ami koko nafatin prodús,” nia tenik.
CCTM hahú prodús mina nuu iha loron 19 maiu 2022, ne’ebé to’o agora konsege prodús hamutuk litru 260 x 1,60 ho rendimentu osan $416.
Daudaun ne’e CCTM ho ninia traballadór prodús mina nuu no rebusadu hamutuk na’in-40.
Jornalista : Vitorino Lopes da Costa
Editora : Julia Chatarina
