DILI, 27 jullu 2023 (TATOLI)– Diretór Jerál Ministériu Saúde (MS), Odete Viegas, hateten, jornalista TATOLI presiza kapasita aan kona-ba termu médiku sira hodi aumenta koñesimentu.
“Ita hakarak funsionáriu TATOLI hetan kapasitasaun, formasaun, nune’e bele hatane, nune’e sai mediadór, ba parte ne’ebé fó informasaun ba públiku. Tanba termu médiku dala barak ema la komprende no la atende ho di’ak entaun husu para halo cross-chek (verifika) hafoin transmiti. Entaun, presiza tebes atu hakle’an koñesimentu ba termu médiku nian,” Odete Viegas hateten ba Tatoli, foin lalais ne’e.
Diretór Jerál ne’e hateten katak Media TATOLI halo serbisu ne’ebé pertinente tebes, maibé presiza haforsa liután parte diseminsaun informasaun ne’ebé hato’o ba públiku.
Aleinde ne’e, ezekutiva ne’e husu TATOLI, mós tenke kobre to’o nível rejionál, nasionál no to’o iha nível globál tanba papél media importante tebes hodi divulga informasaun.
“Ho ne’e hakarak kongratula ba aniversáriu TATOLI ba dala-hitu no durante ne’e TATOLI mós kontribuisaun ba papél Ministériu Saúde nian ne’ebé hatutan informasaun kona-ba programátika no boa governasaun nian ba ita-nia populasaun,” nia konklui.
Entretantu, TATOLI hahú eziste nu’udar embriaun iha loron 27 jullu 2016 no lansa direta husi Primeiru-ministru, dr. Rui Maria de Araújo, iha momentu ne’ebé.
Jornalista dahuluk, iha TATOLI mak Manuel Pinto, atuál hanesan Prezidente Konsellu Diretivu, Xisto Freitas da Piedade, Rafael Ximenes de Assis Belo, Rita Almeida, Zezito da Silva, Maria Auxiliadora Freitas no Juliah Chatarina Lapudooh.
Vizaun no misaun husi ajénsia notisioza Timor-Leste, TATOLI, I.P mak sai “trend-setter” no informasaun nasionál ne’ebé kualidade no kredível no nesesitadu husi públiku utilizadór informasaun (vizaun).
No, misaun TATOLI mak:
- Fornese produtu notísia ne’ebé mak públiku utilizadór informasaun jerelmente presiza.
- Atende nesesidade informasaun públiku utilizadór informasaun ho karakter antesedente, indepth, klasifikadu no “taylor-made information” no self users assigment.
- Sai produtór no jestór informasaun no dokumentasaun nasaun.
- Sai produtór filme no dokumentasaun nasaun.
- Sai organizadora funsaun “ information clearing house”.
- Sai órgaun opiniaun públiku .
- Hala’o funsaun instituisaun peskiza no dezenvolvimentu komunikasaun aplikada.
- Sai “state public relations”.
- “State agent of information”.
- “ Flag carrier” Timor-Leste nian.
- Realizadór fórum informasaun públiku.
Hahú husi jornalista na’in hitu, ohin loron, TATOLI, iha funsionáriu hamutuk na’in 69, kompostu Konsellu Direitu, Fiskál Úniku no mós pesoál administrasaun no finansa inklui redasaun. Entre na’in 69, jornalista destakadu iha munisípiu Baucau, Viqueque, Covalima, Bobonaro, Rejiaun Autonoma Espesiál Oe-cusse Ambeno (RAEOA), enkuantu munisípiu seluk seluk, nune’e mós rejionál no kontinentál.
Jornalista : Osória Marques
Editór : Rafael Ximenes de A. Belo
