DILI, 14 agostu 2023 (TATOLI)—Bee Timor-Leste, Empreza Públika (BTL, E.P) monta ona kontadór hamutuk 16.750 ba komunidade asesu bee-moos iha territóriu laran.
“Kontadór ne’ebé ita monta ona hamutuk 16.750. Hosi Dili rasik, antes ne’e ita monta ona 16.000 maibé survei ikus tun fali 14.000 no munisípiu hamutuk 16.100 resin maibé foin monta hamutuk 2.750,” Diretór Diresaun Operasaun no Manutensaun BTL, E.P, Aleixo dos Santos, informa ba Agência Tatoli, iha ninia knaar fatin, Caicoli, segunda ne’e.
Notísia relevante : BTL, E.P sei halo melloramentu ba sistema bee-moos iha kapitál
Nia dehan, komunidade ne’ebé monta ona kontadór dalaruma hasai fali no uza bee ne’ebé dada ilegál tanba menus konsiénsia no seidauk hatene importánsia kontadór ne’e rasik.
“Sansaun ba ema sira ne’ebé halo ligasaun ilegál mak ita ba hakotu haruka sira rejistu iha BTL, E.P no monta kontadór ba sira, se lae ita sei taka permanente bee ba sira. Maibé sira monta ona kontadór mak halo fali ligasaun ilegál ida-ne’e sira sei selu bazeia ba kustu sistema ne’ebé instala ona, bele selu hahú hosi $100 to’o $500 liu,” nia akresenta.
BTL, E.P rejista ema halo ligasaun ilegál hamutuk 1.050 ka 4%. Ba sira ne’ebé monta ona kontadór kada fulan ne’e selu tuir konforme sira uza volume bee.
“Tanba nia folin haree ba metru kúbiku $0,20. Reseita ne’ebé ita rekolla ba kofre Estadu hahú hosi monta kontadór, fa’an bee-moos no seluk tan hahú hosi janeiru to’o marsu $219.647 no hosi abríl mai juñu hamutuk $234.415,62,” nia relata.
Jornalista : Arminda Fonseca
Editora : Julia Chatarina
