MALIANA, 05 setembru 2023 (TATOLI)-Diretór Sérvisu Munisipál Agrikultura Munisípiu Bobonaro, Alberto Gomes Lopes, informa irrigasaun Maliana II ne’ebé kondisaun aat kuaze tinan barak agora iha ona sinál pozitivu hosi governu atu konstrui, tanba Ajénsia Dezenvolvimentu Nasionál (ADN) aprova ona.
Notísia Relevante:Agrikultór Tapo-Memo falla kolleta Hare tinan 2023
“Projetu konstrusaun ba irigasaun Maliana II ne’e, nia prosesu administrativa la’o ona no ADN aprova ona,” nia ko’alia iha Eis Kámara Bispu Dioseze Maliana, segunda ne’e, hodi hatán ba agrikultór sira-nia preokupasaun
Nia dehan, iha loron-tersa, 05 setembru ne’e sei sosializa komunidade no agrikultór sira molok implementa projetu ne’e.
Nia dehan, obra ne’e tuir planu sei implementa iha tinan 2024.
“Nia hahú hosi Mota Malibaka to’o Tunubibi, ne’e halo konstrusaun foun, la’ós reablitasaun,” nia esklarese.
Alberto subliña, iha projetu ne’e sei konstrui mós barrajen ida ho nia portaun rua hodi kanaliza bee ba Agrikultór sira iha suku Tapo-Memo, Saburai no Holsa.
Nune’e mós portaun ida distribui ba agrikultór sira parte Builalu, Haikesak no Turiskain, Indonézia nian.
“Nia prosesu administrativa jurídiku hosi irigasaun Maliana II finál ona, agora ita avansa ona ba koordenasaun entre nasaun rua, depois ita hetan ona aseitasaun, iha akordu no karta entendimentu, tinan oin bele implementa,” nia katak.
Enkuantu tuir dadus ne’ebé Agência TATOLI asesu, irrigasaun Maliana II ne’ebé atu konstrui ho nia distánsia klilómetru neen, hahú hosi mota Malibaka, suku Tapo-Memo ba to’o aldeia Tunubibi.
Irrigasaun refere fornese bee ba natar kuaze ektare 1,800 ne’ebé pertense ba komunidade agrikultór sira hosi suku Tapo-Memo, Saburai no suku Holsa.
Notísia relevante: Komunidade Maliana Halerik Kondisaun Estrada-Irrigasaun
Jornalista: Sérgio da Cruz
Editór: Evaristo Soares Martins
