MALIANA, 08 setembru 2023 (TATOLI) – Atu prevene virus ka moras Rabies labele transmite mai territóriu Timor-Leste, Autoridade Munisipál Bobonaro (AMB) alerta ba abitante sira labele sosa asu ilegál sira-ne’ebé hatama hosi Provínsia Nusa Tengara Timur (NTT), Atambua, Repúblika Indonézia.
Apelu ne’e hato’o hosi Prezidente Autoridade Munisípiu Bobonaro, Ernesto de Oliveira Barreto, tanba daudaun ne’e virus ne’e to’o ona NTT no hamate ona ema.
Notísia Relevante:MAP-MS sensibiliza prevensaun hasoru virus Rabies iha Raifun
“Moras asu riabies ne’e tanba asu baratu joven sira hakarak sosa ilegál, maibé ita haan tiha asu ne’e raan sira-ne’e la halai, ita mate ona, depois asu ne’e bá tata ema seluk tán nia mós mate, ne’ebé ita iha fronteira ne’e risku tebes,” nia hateten iha salaun Cruz Vermelha Timor-Leste, Maliana, sesta ne’e.
Nune’e apela ba xefe suku no xefe aldeia sira atu habelar imformasaun ba komunidade hotu liuliu sira-ne’ebé besik liu iha fronteira atu nune’e bele hatene moras ne’e hodi preven-aan molok virus ne’e alastra mai Timor-Leste.
Antes ne’e parte Departamentu Pekuária no Veterinaria Munisipiu Bobonaro mós fó hanoin ba komunidade sira besik iha liña fronteira bainhira identifika animál liuliu asu ne’ebé mak hatudu sinál hanesan kabeen sai hosi ibun, ta’uk naroman ka hakarak hela deit iha nakukun, tata arbiru sasán no tata ema, tenke hato’o lalais imformasaun ba Ministériu Saúde atu bele halo intervensaun lalais.
Notísia Relevante:TL Sei Livre Husi Moras Raiva
Jornálista: Sergio da Cruz
Editór: Evaristo Soares Martins
