DILI, 02 outubru 2023 (TATOLI)—Vise Ministru ba asuntu Parlamentár, Adérito Hugo da Costa, hateten Governu identifika ona infraestrutura hamutuk 56 atu halo normalizasaun ho karáter urjensia ba estrada, ponte no irrigasaun ne’ebé hetan estragu hosi dezástre naturál.
Notísia Relevante:Komisaun E husu MOP normaliza lalais estrada-ponte ne’ebé hetan estragu
“Governu liuhosi rezolusaun ida iha Konsellu Ministru aprova iha semana liu ba, liuhosi obra públika levantamentu faktu sira iha durante ne’e, deteta iha 56 pontu sira mak hanesan estrada, ponte no irrigasaun ne’ebé kategoriza emerjénsia,” Vise Ministru ne’e hateten liuhosi reuniaun plenária Parlamentu Nasionál hodi responde preokupasaun Deputadu sira-nian, segunda ne’e.
Governu aprova ona desizaun ne’e hodi Ministériu Obra Públika (MOP) atu halo implementasaun hahú ona halo normalizasaun ho karáter emerjénsia.
“Espera katak agora ita tama ona ba fulan-outubru, tanbasá Governu foti desizaun pontu hamutuk 56 ne’e hanesan emerjénsia, Tanba, akontesimentu sira liga ho udan boot inisíu tinan ne’e, infraestritura hetan estragu barak no nunka halo normalizasaun. Haree ba ida-ne’e, se ita liuhosi prosesu normál la konsege halo intervensaun imediata,” nia hateten.
Tanba ne’e, tuir nia, Governu deside ona halo normalizasaun konstrusaun ba estrada sira ho karáter emerjénsia.
MOP daudaun ne’e serbisu la’o hela no konvida setór privadu sira-ne’ebé iha kapasidade no kompeténsia bele ezekuta hadi’a estrada, ponte no irrigasaun sira lalais antes tama ba tempu udan iha fulan-novembru ka dezembru tinan ne’e.
Iha reuniaun plenária PN, Deputadu sira levanta preokupasaun hodi husu Governu atu normaliza estrada, ponte no irrigasaun ne’ebé hetan estragu hosi dezástre naturál.
Jornalista : Nelson de Sousa
Editór : Cancio Ximenes
