DILI, 11 outubru 2023 (TATOLI) – Proposta rezolusaun Parlamentu Nasionál kona-ba ratifikasaun akordu entre Timor-Leste no Ajénsia Internasionál Enerjia Atómika ba aplikasaun salvaguarda iha ámbitu Akordu La’ós-Proliferasaun, no mós ninia protokolu adisionál hetan ona aprovasaun iha Konsellu Ministru.
“Haree ba nesesidade hodi asegura kumprimentu obrigasaun internasionál sira ne’ebé asume husi Timor-Leste, no mós kontinua fó kontribuisaun ba solusaun konflitu sira ho pasifika no eliminasaun totál ba armas nukleares iha rejiaun ne’e no iha mundu”, refere komunikadu husi Governu.
Nota ne’e relembra katak Timor-Leste ratifika tiha ona Tratadu La’ós-Proliferasaun no Tratadu kona-ba Proibisaun Armas Nukleares no tratadu hirak ne’e estabelese obrigasaun hodi selebra akordu salvaguarda jeneralizada ida ho Ajénsia Internasionál Enerjia Atómika nian.
Nota katak, intensaun Timor-Leste hodi adere ba tratadu kona-ba Zona Livre Arma Nukleares Sudeste Aziátiku nian, iha ámbitu prosesu adezaun ba ASEAN, ne’ebé ezije mós ninia membru sira hodi selebra akordu salvaguarda jeneraliza ida ho Ajénsia Internasionál refere.
Timor-Leste asina ona akordu salvaguarda jeneraliza ida ho Ajénsia Internasionál Enerjia Atómika iha loron 6 fulan-outubru 2009.
Jornalista: Osória Marques
Editora: Maria Auxiliadora
