DILI, 14 novembru 2023 (TATOLI) – Prezidente Repúblika, José Ramos Horta, husu ba Governu atu tau atensaun sériu hodi kombate má nutrisaun iha Timor-Leste.
“Iha 2024, polítika di’ak tebes atu kombate má nutrisaun, entaun alimentasaun ba labarik, inan isin rua sira, estratejia polítika ne’ebé tenke investe didi’ak para kombate má nutrisaun iha Timor-Leste”, Horta dehan ba jornalista sira iha Ótel City 8 Manleuana, ohin.
Tuir nia, Governu da-sia importante tebes atu lansa polítika ne’ebé nivél mundiál hodi kombate má nutrissun krónika ba labarik sira hosi idade 0-2 ba leten.
Nia dehan, Governu la tau atensaun ba polítika ida-ne’e mak má nutrisaun kontinua eziste no labarik barak bele moris ho difisiente inteletuál.
“Atu kombate mak ne’e, Governu tenke tau matan ba inan isin rua liuhosi programa nutrisaun, programa saúde liuliu parteira sira tenke halo check hela de’it ba inan isin rua sira hodi fó tratamentu halo didi’ak, loke eskola infantil barak iha Timor-Leste, atu kombate má nutrisaun, tanba labarik sira mak futuru rai ida-ne’e, ita tenke kuidadu sira”, Horta dehan.
Nia husu mós ba Governu atu kria seguransa alimentár ne’ebé sai prioridade atu bele atinje objetivu kombate má nutrisaun.
Jornalista: Hortencio Sanchez
Editór : Zezito Silva
