DILI, 15 novembru 2023 (TATOLI) – Espesialista nasionál no internasionál na’in-neen ne’ebé Ministériu Edukasaun (ME) kontrata halo hela avaliasaun ba revizaun kurríkulu eskola bázika terseiru siklu nian.
“Ita kontratu ona ekipa espesialista nu’udar peritu iha kada dixiplina atu halo uluk avaliasaun ba draf revizaun kurríkulu atubele aserta didi’ak asuntu revizaun ne’e”, Koordenadór Gabinete Unidade Kurríkulu Nasionál, João Maupelu, hatete iha Vila Verde, ohin.
Avaliasaun ba revizaun kurríkulu bainhira hotu ona mak peritu sira ne’e sei aprezenta relatóriu ba ministériu, nune’e iha 2024 bele tama ona ba diskusaun kada dixiplina hodi haree mudansa sira iha ninia konteúdu sira.
Tanba ne’e, ME husu ba ekipa espesialista sira atu aselera avaliasaun molok taka tinan 2023 bele konklui ona, nune’e tinan oin bele avansa ba reforma kurríkulu.
“Iha nasaun barak, kada tinan tolu sempre halo revizaun ba sira-nian kurríkulu, maibé iha Timor-Leste liu ona tinan 10 maka ko’alia kona-ba asuntu ne’e. Ne’e duni, revizaun ne’e presiza halo hodi garante kualidade edukasaun ba nivel eskolaridade terseiru siklu iha territóriu”, esplika.
Ba João Maupelu, kurríkulu nu’udar xave ida atu hadi’ak kualidade ensinu, tanba hanesan matadalan ida atu lori labarik ida bainhira remata nia estudu iha terseiru siklu tenke iha kompeténsia sira ne’ebé define iha kurríkulu ne’e rasik.
“Kompeténsia sira ne’e define iha konteúdu kurrikulár dixiplina saida maka nia tenke aprende, maibé tenke halo adaptasaun ba kurríkulu ne’e bazeia ba dezenvolvimentu globalizasaun edukasaun mundiál”, katak.
Nia dehan konteúdu husi revizaun ba dixiplina sira ne’e importante atu haree kona-ba planu aula ba kada dixiplina. Ida ne’e maka sei ajuda profesór sira atubele la’o tuir karik iha planu ne’e maka ezije prátika, entaun profesór tenke prepara matéria kona-ba prátika nian, nune’e bele ajuda estudante sira. Bainhira laiha sira tenke buka referénsia husi livru sira atu hanorin iha aula.
“Husi kada dixiplina sira, ezemplu matemátika, durante ne’e iha problema ho livru sira. Daudaun livru matemátika ne’ebé estudante sira asesu ne’e esplikasaun maka barak liu duké kontajen. Tanba ne’e maka ministériu halo revizaun atu haree husi planu de aula husi kada dixiplina hotu depois maka sei hadi’a iha ninia konteúdu sira iha maneira hanorin”, dehan.
Dixiplina sira husi terseiru siklu ne’ebé hetan revizaun maka Matemátika, Inglés, Portugés, Istória Geografíka, Siénsia Fíziku-Naturais no Tetun.
Notísia relevante: Revizaun ba kurríkulu eskola bázika garante prosesu aprendizajen la’o tuir padraun
Jornalista: Tomé Amado
Editora: Maria Auxiliadora
