DILI, 08 novembru 2023 (TATOLI) – Ministériu Edukasaun (ME) halo revizaun ba kurríkulu eskola bázika terseiru síkulu nian hodi garante ensinu aprendizajen iha tinan oin bele la’o tuir padraun.
Objetivu halo revizaun ba kurríkulu mak ministériu hakarak halo produsaun ba livru sira ba sétimu, oitavu no nonu anu, tanba ne’e presiza hadi’a uluk kurríkulu molok halo produsaun.
Ministra Edukasaun, Dulce de Jesus, hatete bainhira revizaun kurríkulu ba terseiru siklu remata ona maka sei kontinua ba kurríkulu eskola sekundária no tékniku vokasionál nian iha tinan oin, nune’e ministériu bele avansa ona hodi investe ba kualidade edukasaun iha mandatu tinan lima nia laran.
Revizaun ba kurríkulu terseiru sikulu nian ne’e sei halo ba dixiplina hotu, tanba ultrapasa ona tinan 10, nune’e ministériu foti desizaun hodi halo ida ne’e atubele ajusta ba dezenvolvimentu edukasaun globál.
Bainhira finaliza ona revizaun ba kurríkulu refere maka ministériu foin halo rekrutamentu ba manorin sira bazeia ba área espesífika sira nomós sei fó oportunidade liubá kandidatu profesór sira ho grau lisensiatura iha área edukasaun atu prienxe vaga hodi garante dezenvolvimentu edukasaun.
“Ita halo ida ne’e atu asegura prosesu ensinu aprendizajen ba estudante sira iha eskola bele la’o ho efetivu, depois maka sei loke tan konkursu ba área jerál sira seluk”, realsa.
Jornalista: Tomé Amado
Editora: Maria Auxiliadora
