BOBONARO, 05 novembru 2023 (TATOLI) – Kompañia Vieramor Unipesoál Limitada hahú konstrui Ponte iha estrada área Hali-Mesak, aldeia Ana-hun, suku Odomau, postu administrativu Maliana, munisípiu Bobonaro, hodi fasilita movimentasaun transporte públiku no privada hosi diresaun Maliana Vila ba postu administrativu Bobonaro, Lolotoe no munisípiu Covalima.
Benancio Perreira Lopes nu’udar abitante Bobonaro, agradese ba governu ho konstrusaun ponte ne’e bele responde ona komunidade nia preokupasaun.
Notísia relevante: Rai-halai estraga kioske iha merkadu Hali-Mesak
“Ami kontente tanba tinan rua ka tolu ba kotu, udan boot estrada ne’e kotu tiha, monu tún ba hotu kraik, ema la’o de’it mós ladi’ak, agora governu halo ona ponte ne’e, ita haree ba di’ak oituan ona, udan mai moos nia la ameasa hanesan uluk ne’e,” nia informa ba Tatoli, iha merkadu lokál Ilibole, tersa ne’e.
Motorista kamioneta, Carlos Amarál, konsidera ho konstrusaun ponte ne’e ba oin movimentasaun iha tempu udan laiha ona impedimentu.
“Fatin oan ne’e, kuandu udan ne’e, bee, rai hosi leten ne’e halai tún mai hotu, ku’ak naruk loos, ami ho karreta tula sasán todan liu araska loos, tanba rai-mamar, halo karreta mout, só uza karreta seluk dada tiha mak foin sai,” nia haktuir.
Nia husu ba kompañia Vieramos atu aselera implementasaun projetu tanba bainhira udan tún maka’as bele prezudika serbisu.
Obra ne’e hahú implementa iha fulan kotuk liubá no dadaun ne’e ninia atinjimentu progresu fíziku to’o ona faze atu cor ponte leten.
Observasaun Ajénsia Tatoli iha terrenu notak katak, mákina pezadu hosi empreza ne’e mós hahú ateru estrada no aparu foho lolon besik iha área ponte ne’e, hodi prevene akontese rai-halai.
Notísia relevante: Estrada kotu difikulta kompañia aselera projetu eletrifikasaun iha Raiheu
Jornalista: Sérgio da Cruz
Editór: Evaristo Soares Martins
