iklan

EKONOMIA, BOBONARO, HEADLINE, MUNISÍPIU

Rai-halai estraga kioske iha merkadu Hali-Mesak

Rai-halai estraga kioske iha merkadu Hali-Mesak

Komunidade suku Odomau, postu administrativu Maliana, munisípiu Bobonaro, João da Cruz, hatudu hela rai taka kioske merkadu Hali-Mesak. Imajen Tatoli/Sérgio da Cruz.

BOBONARO, 22 novembru 2022 (TATOLI) — Akontesimentu udan-boot iha semana kotuk rezulta rai halai estraga kioske merkadu lokál ne’ebé lokaliza iha área Hali-Mesak, suku Odomau, postu administrativu Maliana, munisípiu Bobonaro.

Merkadu refere inaugura hosi Primeiru Ministru (PM), Taur Matan Ruak, iha sesta loron 16 fulan-setembru tinan ne’e.

Abitante suku Odomau, João da Cruz, haktuir rai halai tanba momentu Institutu Jestaun Ekipamentu, Institutu Públiku (IGE,I.P, sigla portugés) ateru rai hosi parte leten, taka hotu bee dalan nune’e udan-boot mai bee-sulin tama fali ba merkadu laran rezulta kioske tolu mak hetan estragu grave.

Notísia relevante: PM Taur inaugura merkadu Hali-Mesak

“Ha’u hanoin momentu dudu rai ne’e mak buat ruma sá tán netik, ne’e la akontese hanesan ne’e, maibé buat ida klima ne’e ita la hanoin katak atu aat, maibé no fim udan mai estrada hosi leten dudu tún to’o uma sira-ne’e moos aat hotu, ai-rin sira haksoit sai hotu kedas,” abitante ne’e informa ba Jornalista Tatoli, iha merkadu Hali-Mesak, tersa ne’e.

Negogosiante ne’e mós sente triste haree kondisaun refere, ne’e duni husu ba Primeiru Ministru Taur Matan Ruak, atu orienta IGE,I.P halo intervesaun lalais, tanba aliserse rai hosi parte leten no kraik la metin ona.

Iha momentu inaugurasaun merkadu refere, Xefe governu Taur Matan-Ruak bandu komunidade sira atu haluan tan espasu, tanba rai sira iha parte Hali-Mesak nia aliserse hanean ema ida karik ruin laiha nune’e iha tempu udan sempre risku ba dezastre naturál.

Abitante suku Raifun, Orlando Asi-Loco, sente triste tanba  utiliza osan rasik hari uma loke kioske seidauk utiliza natureza hahú estraga ona.

“Agora ami halo tiha estadu apoiu, rai-halai hanesan ne’e entaun ami lakon ona, ami husu ba estadu atu mai dudu fila-fali rai sira-ne’e,” nia husu.

Merkadu refere harii iha governu anteriór, maibé durante tinan barak la uza, nune’e joven inisiadór Francisco da Cruz, hola inisiativa organiza komunidade no veteranu sira halibur ideia hodi husu autorizasaun iha autoridade munisípiu Bobonaro, koordena ho IGE ateru rai halo tetuk.

Hafoin ida-ne’e mak fó oportunidade negosiante sira liuhosi prosesu loke rejistrasaun etapa dahuluk ba negosiante sira hamutuk 15 ne’ebe hakarak harii uma loke kioske mai hosi suku Odomau, Raifun, Ritabou no suku Hau-Ba, postu administrativu Bobonaro.

Enkuantu estabelesimentu merkadu ne’e tanba haree ba makro hodi kontribui ba programa governu cadeia de valores, no hare ba makro boot-liu mak atu halo komplementár Governu nian atubele trasa polu dezenvolvimentu ida hosi Batugade.

Nune’e mós haree ba mikro ida ki’ik ne’e atu hapara urbanizasaun katak komunidade hotu ninia atividade negósiu labele konsentra de’it iha kapitál munisípiu, no razaun seluk mak atu estímula produtu lokál oinsá agrikultór sira hasa’e produsaun agríkola.

Notísia relevante: IGE sei normaliza estrada diresaun Halimesak to’o Oe-leu

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!