PM Taur inaugura merkadu Hali-Mesak

BOBONARO, 16 setembru 2022 (TATOLI)—Primeiru Ministru (PM),Taur Matan Ruak, sesta ne’e inaugura mini merkadu Hali-Mesak, ne’ebé lokaliza iha aldeia Ana-Hun, suku Odomau, postu administrativu Maliana, munisípiu Bobonaro, ne’ebé sei benifísia komunidade sira iha postu administrativu tolu.

Merkadu refere estabelese ona iha governu anteriór, maibé durante tinan barak la uza, nune’e Francisco da Cruz, hola inisiativa organiza komunidade no veteranu sira halibur ideia hodi husu autorizasaun iha autoridade munisípiu Bobonaro, koordena ho Institutu Jestaun de Ekipamentu, Institutu Públiku (IGE,I.P, sigla portugés) ateru rai halo tetuk.

Notísia relevante: PM Taur kolleta ikan Nila-Tilapia tonelada ualu iha Leohitu

Hafoin ida-ne’e mak fó oportunidade negosiante sira liuhosi prosesu loke rejistrasaun etapa dahuluk ba negosiante sira hamutuk 15 ne’ebe hakarak harii uma loke kioske.

Daudaun ne’e uma merkadu ne’ebé negosiante sira konstrui ona ne’e hamutuk 15 mai hosi postu administrativu Maliana kompostu hosi suku Odomau, Raifun, Ritabou no Lahomea. Enkuantu postu administrativu Cailaco mak suku Atudara, Raiheu no suku Carabau no Hauba hosi postu administrativu Bobonaro.

Primeiru Ministru Taur-Matan Ruak, kontente bele inaugura merkadu ne’e, maske serbisu barak no tempu araska, maibé iha votade atubele partisipa iha serim’onia simples ne’ebé nakonu ho valór.

Tanba la’ós Estadu de’it mak ke’e rikeza, maibé rikeza ne’e komunidade sira mak ke’e liuhosi esforsu-aan no badinas hodi hakbiit ekonomia familia nian.

Ne’e duni estabelesimentu merkadu refere hodi haforsa no valoriza kreatividade sidadaun sira.

“Primeiru ha’u fó parabéns ba imi-nia inisiativa, tanba imi organiza malu, mobiliza malu kria kondisaun rasik, la hein estadu. Ha’u hatene fatin idane’e aban bainrua sei rame, no sai fatin ida ba prodús rikeza iha-ne’e, tanba sira hotu lori sasán mai, futu-manu karik osan sirkula iha-ne’e, ema ruma tuir dalan sosa karik entaun osan ba inan-aman sira,” Xefe governu apresia inisiativa ne’e.

Eis Prezidente Repúblika iha esperansa katak inisiativa ida sai hanesan ezemplu ba joven sira iha territóriu nasion’al atu banati-tuir hodi kria kondisaun moris ba aan rasik. Hanesan jogu futeból ida karik, ema mak buka bola hatama golu, la’ós bola mak buka bola ema-nia ain.

Maibe Xefe governu observa katak, rai iha areadór merkadu ne’e maioria risku ba dezastre natural, nune’e  alerta ba komunidade no negosiante sira, atu labele haluan espasu nune’e udan monu-rai labele akontese rai-halai tanba rai ne’e ninia aliserse hanesan ema ida karik ruin laiha.

“Ha’u husu apoia ba inan-aman sira kuda ai barak, ita hotu-hotu mai uza fatin ida-ne’e favór kuda hali, kuda ai-samatuku nune’e udan kaer ita-nia rai, depois tenke hanoin mos bee sulin ne’e imi atu lori ba ne’ebe atu labele sobu rai,” Primeiru ministru fo hanoin.

Joven inisiadór Francisco da Cruz, informa, iha negosiante barak inklui mós postu administrativu Lolotoe mak hakarak atu halo atividade negosiu iha fatin ne’e, maibé governu presiza ateru rai halo luan Tanba rejistrasaun etapa segundu ne’e ema hamutuk 30 mak preparadu mai harii kioske.

Razaun Francisco hakarak loke merkadu ne’e tanba haree ba makro hodi kontribui ba programa governu cadeia de valores, no harrr ba makro boot-liu mak atu halo komplementár Governu nian atu trasa polu dezenvolvimentu ida hosi Batugade.

Nune’e mós haree ba mikro ida ki’ik ne’e atu hapara urbanizasaun katak komunidade hotu ninia atividade negósiu labele konsentra de’it iha kapitál munisípiu, no razaun seluk mak atu estímula produtu lokál oinsá agrikultór sira hasa’e produsaun agríkola.

“Ida sai hanesan sentru abastesimentu ba produtu lokál, ne’e sei la fa’an sasán sasan sira seluk, maibé ne’e fokus liu ba produtu lokál atu abasteze ba merkadu iha Dili ka rai- li’ur tanba ita iha kontaktu barak ho sira atu hola naran katak hadi’ak mak fatin ne’e,” joven inisiadór ne’e fundamenta.

Atu atinje objetivu hirak-ne’e, Francisco rekomenda ba Governu atu harii sentru formasaun vosasionál inklui kampu desportu atubele anima kria amizadade ne’ebé armónia iha fatin refere.

Prezidente autóridade munisípiu Bobonaro, Ernesto de Oliveira Barreto, konsidera isiativa ne’e di’ak tebes, tanba la hein de’it apoia hosi Governu.

Ne’e duni Ernesto rekomenda ba Governu komptente atu kontinua kria kondisaun iha markadu ne’e nune’e negosiante sira bele fa’an sira-nia produtu iha fatin ne’ebé dignu, tanba dadaun ne’e fasilidade balun seidauk kompletu.

“Ha’u hanoin tempu badak ita presiza moru protesaun ruma, atu nune’e udan-boot keta halo ber sobu fali, agora ami-nia orsamentu PDIM tinan oin ami labele halo buat ida tanba buat hotu feitu tiha ona, ne’ebé karik bele tau matan netik ba fatin ne’e tanba populasaun lakon tiha osa,” nia rekomenda.

Partisipa iha serimónia ne’e, Ministru Justiça,Tiago Amarál Sarmiento, Prezidente Konsellu Administrasaun Bee Timor-Leste, Empreza Públika (BTL,E.P), Carlos Peloi dos Reis, Prezidente Konsellu Administrasaun Institutu Jestaun Ekipamentu, Institutu Públiku (IGE,I.P sigla português), Ermenegilda da Costa Laurentina, Komandante polísia munisípiu Bobonaro, Superintendente Antoninho Mauluta, autoridade lokál, veteranu no komunidade sira.

Notísia relevante: Negosiante merkadu Maliana hetan rendimentu di’ak Iha finadu

Jornalista: Sérgio da Cruz

Editór: Evaristo Soares Martins