DILI, 10 janeiru 2024 (TATOLI)—Traballadór timor-oan na’in-867 (feto 16 no seluk mane) iha Koreia Súl sei hetan renovasaun kaderneta pasaporte ne’ebé expiradu ona.
“Traballadór timor-oan ne’ebé serbisu iha Koreia Súl daudaun ne’e hamutuk 4.822, ne’ebé hosi númeru ne’e iha ema na’in-867 mak kaderneta pasaporte mate ka expira ona, tanba ne’e presiza halo renovasaun, maibé númeru ne’e bele liu,” Diretór Nasionál Empregu Estranjeiru hosi Sekretaria Estadu Formasaun Profisionál no Empregu (SEFOPE), João Correira Pereira, ba Agência Tatoli, via telefónika, kuarta ne’e.
Ekipa halo renovasaun pasaporte ne’e kompostu hosi Servisu Rejistu Notariadu hosi Ministériu Justisa (MJ) hamutuk ho SEFOPE.
“Ita-nia ekipa ohin aranka ona, sira sei to’o iha loron 12 janeiru hodi halo renovasaun pasaporte to’o loron 20 janeiru. Ekipa fila hikas mai Timor-Leste iha loron 21 janeiru 2024,” nia akresenta.
Notísia relevante : SEFOPE rejista traballadór timor-oan 1.225 iha Koreia Súl sai hosi sistema
Embaixada Timor-Leste ho Gabinete Adidu iha Seoul mós fó sai informasaun liuhosi pájina Facebook hodi husu traballadór timor-oan sira ne’ebé serbisu iha Koreia Súl, ida-idak atu koordena ho empregadór hodi hetan lisensa hodi halo renovasaun pasaporte.
Embaixada sei simu ema 150 kada loron, ne’ebé parte dadeer simu ema 75 no lorokraik ema 75, ho razaun espasu iha Embaixada klo’ot no evita barullu iha areadór Lotte Castle President iha andar dahuluk Suite 2401, 101D Lotte Castle President, 109 Mapo-daero, Mapo-gu, Seoul, 04146).
“Husu ba kolega timor-oan sira hotu atu kolabora ho parte seguransa Polísia Mapo-gu, ofisiál edifísiu Lotte nomós kolega sira ne’ebé serbisu iha liña primeiru pisu nian, atu nune’e ita-nia serbisu bele la’o didi’ak no ema labele hato’o deskontentamentu ba Embaixada nia serbisu iha distritu Mapo-gu,” refere komunikadu.
Kritériu ba dokumentu sira ne’ebé uza hodi halo renovasaun pasaporte mak hanesan Billete Identidade (BI) sei válidu, sertidaun nasimentu RDTL inklui pasaporte tuan.
Traballadór timor-oan ne’ebé serbisu iha Koreia Súl hahú hosi tinan 2009 to’o 2024 hamutuk 5.914, ne’ebé hosi númeru ne’e fila ona mai Timor 1.046, enkuantu kontinua serbisu 4.822.
Jornalista : Arminda Fonseca
Editora : Julia Chatarina
