DILI, 24 janeiru 2024 (TATOLI) – Diretór Jerál Servisu Rejistu Notariadu, João Fernando Martins Borges, hateten aplikasaun ajendamentu online iha Ministériu Justisa (MJ) sei loke ba públiku, hahú iha 29 janeiru 2024.
Nia rekorda, atedimentu ba aplikasaun ajendamentu online lansa tiha ona iha semana kotuk iha 18 janeiru 2024, ho modu haat, hanesa atedimentu Passaporte, Billete Identidade (BI), Sertidaun Moris inklui atendimentu ba Rejistu Kriminál.
“Ohin ha’u fó orientasaun ba Diretór Identifikasaun Sivil hodi rezolve pedidu sira ne’e, nune’e bele kontinua fó atendimentu ba ita-nia sidadaun sira, maibé hahú hosi ohin to’o sesta ne’e ita tenke rezolve pedidu sira tama no segunda 29 janeiru ita hahú loke aplikasaun ajendamentu online atu ema bele asesu ba atedimentu Passaporte, Billete Identidade (BI), Sertidaun Moris inklui atendimentu ba Rejistu Kriminál”, João Fernando hateten ba jornalista sira iha kna’ar fatin Colmera, kuarta ne’e.
Nia husu ba públiku atu labele lori dokumentu hodi ba forma iha notariadu atu trata dokumentu maibé aplika de’it liuhosi online.
“Iha 29 janeiru 2024 kuandu ita loke ona aplikasaun ba ajendamentu online, signifika la iha ona ema ida mai forma iha ne’e, hothotu tenke aplika ba ajendamentu online. Tanba ajendamentu online ne’e evita ema forma naruk”, nia adianta.
João Fernando, hateten atendimentu públiku liuhosi online mak loron ida só simu ema 140, se kuandu liu, ida-ne’e sistema taka aan.
“Ami garante katak atendimentu Passaporte ho aplikasaun ajendamentu online sei la’o di’ak tanba servisu hamutuk entre notariadu ho TIC”, nia afirma.
Nia dehan, atendimentu ba ajendamentu online Passaporte BI , Sertidaun Moris inklui Rejistu Kriminál sei hahú uluk iha Munisípiu Dili, enkuantu munisípiu sira seluk seidauk bele realiza tanba sei haree evolusaun atendimentu liuhosi aplikasaun ajendamentu online.
Notísia relevante : Lansa ona maibé seidauk utiliza ajendamentu online ho razaun
Ministériu Justisa, ohin, lansa sistema ajendamentu online
Jornalista: Natalino Costa
Editór : Zezito Silva
