DILI, 18 janeiru 2024 (TATOLI) – Ministériu Justisa, ohin, halo lansamentu ba serimónia ba sistema aplikasaun ba ajendamentu online ho objetivu atu fó atendimentu públiku ne’ebé nesesita ba presatasaun servisu rejistu notariadu nian.
Serimónia lansamentu ida-ne’e efetua iha 18, janeiru 2024, tuku 09h00 to’o hotu, iha salaun auditoria Ministériu Justisa.
Rekorda fali katak Diresaun Servisu Rejistu Notariadu (DGSRN) iha ona Passaporte hamutuk 20.650 maibé seidauk fó atendimentu tanba sei hein lansamentu ba ajenda online Dili nian, enkuantu iha munisípiu seidauk tanba presiza reune ho diretór notariadu munisipál sira.
Nia mensiona, ajendamentu ne’e kompostu hosi modu haat mak atendimentu Passaporte Billete Identidade, Rejistu Kriminál no tratamentu ba Sertidaun Moris.
Ajendamentu online ne’e ho objetivu atu evita ema atu labele forma naruk iha resintu ministériu nian hafoin trata dokumentu.
Ministériu Justisa sei fó atendimentu, loron ida ba ema 140, kuandu liu mak sistema sei taka automátika. Prosesu atendimentu ba aplikasaun Passaporte online simu de’it aplikante 70 iha sesaun dader no ema 70 iha parte loraik.
Hafoin rekerente halo ona aplikasaun liuhosi online mak foin ba hasai foto, tanba dokumentu hotu aplika ona iha ajendamentu online, depois ba selu iha banku, lori resivu banku nian hafoin entrega resivu ba notariadu sira foin entrega Passaporte.
Kona-ba Passaporte, rekerente sira bele aplika hosi uma de’it, presu ba Passaporte nafatin $100, $75 no $50. Kuandu aplikante sira priénse hotu ona, ba selu iha banku no lori nota ba hatudu iha notariadu no hodi foti Passaporte.
Notísia relevante : Passaporte 20.650 ‘’Chega’’ Dili sei atende ho online, munisípiu seidauk
Ekipa Redasaun
