Lansa ona maibé seidauk utiliza ajendamentu online ho razaun
DILI, 18 janeiru 2024 (TATOLI) – Diretór Jerál Servisu Rejistu Notariadu, João Fernando Martins Borges, hateten Ministru Justisa halo ona lansamentu ba aplikasaun ajendamentu online maibé seidauk funsiona tanba sei rezolve uluk kliente 1000 ne’ebé dokumentu tama ona antes iha sistema maibé estoke Passaporte hotu iha momentu ne’e bá.
“Ajendamentu online ne’e maske halo ona lansamentu ofisiál ba públiku, maibé utilizasaun seidauk loke ba públika tanba ami sei hein rezolve uluk kliente sira ne’ebé antes ne’e hamutuk 1000, sira-nia dokumentu tama ona sistema, maibé la konsege halo produsaun ba sira-nia Pasaporte tanba momentu ne’e estoke hotu, entaun ami rezolve ida-ne’e hotu mak ami sei fó sai avizu ba públiku hodi konkorente sira bele asesu ba aplikasaun ajendamentu online”, João Fernando dehan iha nia intervesaun iha ámbitu serimónia ba lansamentu ajendamentu online ne’ebé hala’o iha sala auditorium Ministeriu Justisa, kinta ne’e.
Aplikasaun ba ajendamentu online ho nia link www.ajendamentu, online.mj.gov.tl, ajendamentu online ne’e sei hahú de’it iha notariadu sentrál no Munisípiu Dili, enkuantu munisipiu sira seluk seidauk bele aplika ba ajendamentu online, tanba sei haree.
Iha fatin hanesan, Diretór Ezektivu Ajensia TIC, Venancio Pinto, revela ajendamentu online ne’e atu mellora atendimentu iha servisu notariadu. Mundu atuál, hakarak ka lakohi, ema hotu tenke adapt aba sistema dijitál iha intituisaun Estadu, presiza adapta sistema teknolojia tanba iha ona Governu Eletróniku, ajendamentu online ida-ne’e parte ida hosi dezenvolvimentu institusionál.
“TIC tau ona planu atu dijitaliza servisu institusaun Estadu sira, ohin, ita hahú hosi notariadu, aban bain rua ba servisu DNTT oinsá oferese servisu ne’ebé di’ak ba ita-nia públiku”, nia adianta.
Iha ámbitu lansamentu aplikasaun ajendamentu online, iha mós asinatura nota entendimentu entre Ministru Justisa Amândio de Sá Benevides no Ministru Transporte Komunikasaun (MTK) Miguel Marques Manetelu, ho objetivu atu mellora servisu ajendamentu online iha future no parte justisa husu nafatin ba TIC atu mantein apoia servisu notariadu nian, nomeadamente ajendamentu online.
Benevides kongratula servisu TIC ne’ebé mak ajuda Diresaun Jerál Notariadu hodi estabelese ona aplikasaun ajendamentu online.
Nune’e mós, Ministru Transporte Komunikasaun Miguel Manetelu, garante katak buat hotu sei la’o di’ak.
“Ha’u garantia katak buat hothotu sei la’o di’ak. Ita tenke moderniza ona ita-nia instituisaun Estadu sira liuhosi programa Governu eletróniku”, nia konklui.
Notísia relevante : Ministériu Justisa, ohin, lansa sistema ajendamentu online
Jornalista : Natalino Costa
Editór : Zezito Silva
