DILI, 26 janeiru 2024 (TATOLI) – Populasaun iha kapitál kontinua senti presu foos aas iha merkadu, maske, Governu fó subsídiu ba empreza si importadora sira hodi fa’an foos iha merkadu ho presu asesível ba konsumidór sira.
Konsumidora foos ho marka Folsom, Elzita Sufa hela iha Bidau Akadiruhun hateten, sira família uma-laran barak hamutuk ema barak, tanba ne’e mak konsome lorloron foos makaas iha uma-laran.
Nia relata, maske folin foos karun iha merkadu nia família kontinua sosa, tanba foos hahán bázika ba sira iha uma.
Elzita Sufa konta, dadersan bele konsome paun, gorengan no produtu lokál iha dadersan, maibé tenki han meudia ho kalan etu.
“Ami han semana ida karon ida. Karon ida $19, maibé ida ne’e foos Folsom 20 KG ne’e. Foos karun iha loja”, Elzita Sufa hateten ba Tatoli, iha Motael.
Nia refere foos ho marka Manu Vitoria iha 25KG ho presu hanesan mos ho foos marka Folsom, mas han ladun gostu hodi konsome lorloron.
Nia hanoin hikas fali foos ho marka sira hanesan ne’e, antes iha folin entre $15 no $16, maibé hahú folin sa’e iha tinan kotuk, folin nunka tuun fila fali durante sira sosa.
Merlinda da Silva hanesan negosiante foos iha Colmera hateten sira foos iha loja importadora sira fa’an marka “Manu Vitoria” karun no hetan rendimentu uituan.
“Iha ne’e ha’u fa’an foos marka “Manu Vitoria” ho presu entre $18 no 18,25 iha loja importadora hodi fa’an tutan”, nia hateten.
Tuir observasaun, foos ho marka Tali Merah, Manu Vitoria ho 25 KG folin no Folson $19 no kada 20 KG inklui marka AAA ho folin $15.
Ministériu Komérsiu no Indústria asina ho empreza sira hanesan Perissos fa’an ona foos ho marka Amor de Família ho presu $10 kada 25 KG, Beruang hosi loja Creative Furak ho presu $9 ba kada 20 KG no “Golden Star” fa’an ho presu $11.50 kada saku ho 25 KG hosi Alfa Dili ba populasaun iha merkadu rai-laran.
Notísia relevante:Governu sei hadia mekanizmu distribuisun foos subsídiu
Jornalista: Jesuína Xavier
Editór: Rafael Ximenes de A. Belo
