DILI, 01 marsu 2024 (TATOLI)—Banku Nasionál Komérsiu Timor-Leste (BNCTL, sigla portugés) deklara katak kliente ne’ebé durante ne’e halo kréditu, maioria selu di’ak hotu.
“BNCTL fó kréditu hamutuk millaun $300-resin, ne’e 97% sira selu di’ak, kréditu ne’ebé ami fó maioria kréditu produtivu, fulan-ida liubá maioria kréditu konsuntivu, ne’e mak individuál sira ne’ebé serbisu no iha kontratu, hanaran kréditu konsuntivu tanba sira selu ho sira-nia saláriu,” Prezidente Komisaun Ezekutiva BNCTL, António Francisco Vitor, relata hafoin reuniaun ho Vise Primeiru-Ministru no Ministru Dezenvolvimentu Rurál no Abitasaun Komunitária, Mariano Assanami Sabino, iha salaun enkontru, Palásiu Governu, sesta ne’e.
Jerente Banku nasionál dehan, kona-ba preokupasaun balun dehan asesu kréditu iha BNCTL ne’e komplikadu, tanba banku hotu nia obrigasaun dahuluk mak kliente nia osan tama iha banku labele lakon.
“Osan sira ne’ebé mak tau iha banku tanba ema fiar mak ema tau, ne’ebé osan ne’e ami sosa ona tenke fa’an fali. Ami atu fa’an ne’e ami hatene ema atu sosa, kuandu fa’an osan ba tenke filafali, ne’ebé nia prosesu tenke di’ak la’ós fahe osan, ne’ebé ami fa’an ba ema ne’ebé bele sosa, depois prinsípiu kréditu ne’e ajuda ema,” nia esplika.
Notísia relevante : BNCTL fó ona kréditu ba veteranu sira ho osan millaun $55
Durante ne’e BNCTL fó kréditu barak maibé tenke kumpre prosedimentu, tanba banku la’ós haree de’it ba kréditu maibé mobiliza fundu no fa’an fali kapitál ho forma osan.
“Ami haree kuandu ema ne’e iha kontratu depois ema ne’ebé emprega nia ne’e bele fó garantia dehan ninia osan fulan-fulan haruka ba banku ami fó kréditu, eseptu ne’ebé la kompleta rekezitu banku, ne’e deskulpa ami labele halo buat ida,” nia tenik.
Rekezitu atu asesu kréditu iha BNCTL maka presiza foti no priense formuláriu ne’ebé mak Banku mak prepara, fotografia koloridu hasai iha banku, kartaun eleitorál rekerente ho kartaun identidade kaben (aplika ba kaben-nain), konta bankáriu ho númeru IBAN (banku mak prepara), kontratu serbisu hosi empregadór, projesaun kaixa fluxu (banku mak prepara), garantia saláriu aplikante no seguru kréditu.
Jornalista : Antónia Gusmão
Editora : Julia Chatarina
