DILI, 07 marsu 2024 (TATOLI)—Governu liuhosi Ministériu Agrikultura, Peska, Pekuária no Floresta (MAPPF) apela ba komunidade iha territóriu nasionál atu labele kasa animál fuik.
Notísia Relevante: Atividade kasa ilegál animal fuik kontinua la’o tanba menus rekursu umanu
Ministru Agrikultura, Peska Pekuária no Floresta (MAPPF), Marcos da Crus, husu populasaun ne’ebé ka’er kilat-manu bele iha konsiénsia di’ak-liu entrega de’it, duké kontribui ba estragu sira kontinua uza kilat-manu hodi kasa animál fuik.
Tanba, nai dehan, biodiversidade hosi animal sira-ne’e la’ós de’it rekursu animál maibé rekursu ba mós turizmu nian ne’ebé bele atrai ema atu mai haree, tanba Timor-Leste iha animál rai-maran no bee laran nian hodi atrai turista sira.
“Oportunidade di’ak atu apela ba ema hirak ne’ebé kaer kilat-manu ou durante ne’e halo estragu, ho sira-nia konsiénsia atu entrega kilat-manu,” Ministru ne’e hateten hodi hatán ba Agência Tatoli nia preokupasaun kona-ba ema kasa animal fuik, iha Parlamentu Nasionál, kinta ne’e.
Ministériu mós fó ona orientasaun ba guarda florestál sira hodi bele halo serbisu operasaun iha fatin sira hotu atu bele halo apreensaun ba kilat-manu, tanba iha kilat-manu ne’e komunidade balun kontinua uza hodi oho animál fuik sira liuliu hanesan meda, lekirauk, manu-fuik, bibi rusa no seluk tan.
Dadaun ne’e, MAPPF iha guarda floresta besik ema 300 ne’ebé destaka iha munisípiu hotu hodi halo prevensaun no sensibilizasaun ba populasaun kona-ba dekretu-lei númeru 5/2016, ne’ebé ko’alia kona-ba sistema nasionál área protejida, ne’ebé bandu komunidade atu kasa animál fuik.
Enkuantu, iha reuniaun plenária Parlamentu Nasionál foin lalais ne’e, Deputadu CNRT Carminda Carlota, preokupa ho informasaun ne’ebé iha katak komunidade balun kontinua uza kilat-manu hodi kasa animál fuik iha área parke Nasionál Nino Koni Santana, postu Lore, munisípiu Lautém.
Notísia Relevante: Komunidade Tutuala preokupa ema kasa animál-fuik iha área protejida
Jornalista : Nelson de Sousa
Editór : Cancio Ximenes
