DILI, 14 maiu 2024 (TATOLI)—Prezidente Komisaun C ne’ebé trata asuntu Finansa Públika iha Parlamentu Nasionál (PN), Cedelizia Faria dos Santos, husu ba autoridade kompetente atu buka tuir autór ne’ebé prodús osan moeda sentavu 50 falsu hodi prosesa tuir dalan legál ne’ebé iha tanba ne’e krime.
Notísia Relevante: BCTL rekolla ona moeda sentavu 50 falsu hamutuk 320
“Husu ba PNTL, PCIC no órgaun kompetente sira atu halo lalais asaun investigasaun imediata ida ho rigirozu hodi nune’e ita bele ka’er autór prodús osan falsu no evita ba futuru labele akontese tan,” Prezidente komisaun C ne’e hato’o iha Parlamentu Nasionál.
Nia preokupa, informasaun ne’ebé mak fó sai husi Banku Sentrál Timor-Leste (BCTL, siglá protugés) ne’ebé hato’o katak to’o fulan-maiu 2024 ne’e, BCTL konsege rekolla ona osan falsu ba moeda sentavu 50 ho nia kuantidade kuaze 400 moeda ona, karik nia valór hamutuk $800.
“Montante ida-ne’e tuir ha’u signifikadu tebes, no ha’u triste mak autór ne’ebé prodús osan falsu ne’e parte kompetente seidauk identifika no kaer,” nia dehan.
Falsifikasuan ita-nia moeda ne’e hanesan aktu krime ida, no ita lahatene osan falsu ne’e prodús iha ita-nia rai-laran ou tama husi estranjeiru mak mai.
“Se prodús iha rai-laran, seráke ita-nia ema sira-ne’e lakonsege deteta no se nia tama husi rai-li’ur oinsá ita ninia fronteira, aeroportu kontrola hodi osan ne’e bele tama hikas osan ne’e espalla barak ona iha ita-nia nasaun,” nia dehan.
Nia konsidera kazu ne’e sériu tebes, tanba ne’e Timor-Leste nia moeda, tanba sira halo ona Timor-Leste nia moeada maibé la konsege deteta no ta’uk bele halai mós osan dolár amerikánu ne’ebé mak uza daudaun, entaun fó impaktu boot liután ba Governu.
Tanba ne’e, nia husu ba BCTL atu kontinua halo sensibilizasaun ba osan falsu sira-ne’e, atu nune’e komunidade bele hatene no hetan karik bele halo keixa lalais.
Notísia Relevante: Komisaun C iha PN husu BCTL investiga sirkulasaun osan falsu
Jornalista : Nelson de Sousa
Editór : Cancio Ximenes
