DILI, 27 juñu 2024 (TATOLI)–Konstrusaun edifisiu Eskola Ensinu Sekundáriu Jerál (ESJ) Nobel da Paz atinje ona 100% nune’e daudaun hein empreza responsável obra, Jerson entrega ba parte eskola.
“Konstrusaun edifísiu foun ne’e gasta osan $100.000 no daudaun atinje ona 100%, hein empreza Jerson husi Japaun ne’e entrega ba eskola hodi reforsa ba saladeaula seluk no utiliza ba prosesu aprendizajen,” Adjuntu Diretór Eskola ESJ Nobel da Paz, Cristovão da Silva, informa iha ninia knaar fatin, kinta ne’e.
Tuir planu edifísiu foun ne’e sei uza ba ezame nasionál iha tinan ida-ne’e, tanba Eskola Nobel da Paz antes ne’e uza salaun iha Bairro Formosa hodi realiza ezame nasionál.
“Edifísiu foun ne’e ho andar ida de’it, maibé la inklui ho pinta, azuleju no plafon. Eskola ne’e mós tuir planu hafoin ezame segundu períodu hahú hasa’e tan andar rua iha leten. Konstrusaun ne’e hahú iha marsu 2024,” nia akresenta.
Aleinde ne’e, Eskola ESJ Nobel da Paz preparadu ona ba ezame trimestre daruak nian tanba durante konstrusaun edifísiu foun ne’e sira-nia prosesu aprendizajen la’o normál.
“Ami Nobel da paz durante ne’e prosesu aprendizajen la’o di’ak, maski ami konstrui ami-nia edifisiu foun, maibé ne’e la prejudika ami-nia prosesu aprendizajen no tuir nafatin kalendáriu ME nian, ami prepara másimu ona ba ezame trimestre daruak. Ami orienta ona profesór sira halo pontu ezame, hahú prepara iha loron 24 juñu no ramata iha 02 juñu, nune’e Sekretáriu nia fatin hodi halo fotokopia ona,” nia relata.
Notísia relevante : Projetu konstrusaun eskola tinan-2021, falta 14 mak seidauk finaliza
Eskola ne’e buat hotu la’o di’ak inklui profesór sira mós sufisiente atu hanorin estudante sira.
“Kona-ba konsensaun eskolár ne’e mós ami laiha problema, tanba ne’e eskola privadu entaun iha fundus rasik, maibé iha problema oituan entre fundadór sira, entaun prejudika ami-nia konsensaun eskolár husi Ministériu Edukasaun, ne’ebé la tama tinan-tolu ona, maibé ida-ne’e prejudika ba imprensaun pontu ezame. Kualidade ezame garante tanba ami iha ne’e profesór barak,” nia dehan.
Totál profesór iha Eskola Ensinu Báziku Sentrál (EBC, sigla portugés) hamutuk 34, ho estudante 365, enkuantu Eskola ESJ iha profesór 40 ho estudante 900-resin.
Jornalista : Osória Marques
Editora : Julia Chatarina
