COVALIMA, 21 Outubru 2024 (TATOLI) – Profesór sira iha eskola bázika sentrál (EBC-sigla portugés) iha Covalima halo ona korresaun ba pontu ezame lokál ba alunu finalista tinan letivu 2024 nian.
“Tuir kalendáriu husi Ministériu Edukasaun, estudante finalista tinan letivu 2024 hahú ezame iha loron 14 to’o 18 Outubru, manorin sira halo ona korresaun ba máteria ezame lokál”, Diretór EBC 123 Suai Loro, Fernando António, dehan ohin.
Nia esplika katak korresaun ne’e halo de’it ba pontu ezame lokál, tanba ba ezame nasionál entrega ona ba Servisu Edukasaun Covalima no haruka bá iha Ministériu Edukasaun mak halo korresaun.
Dixiplina ezame lokál mak hanesan Arte, Desportu, Kompeténsia para Vida Traballu no Edukasaun Sívika Sidadania no Direitu Umanu.
Fernando António salienta katak alunu finalista husi EBC Suai Loro 1 2 3 hamutuk 74, kompostu husi mane 34 no 40 no professor iha na’in- 30.
Iha sorin seluk, Diretór EBC Fatululik, Eusébio da Costa, dehan eskola ne’e mós hahú ona halo korresaun ba dixiplina ezame lokál, tanba alunu finalista remata ona realiza ezame nasionál no lokál iha semana kotuk.
“Ohin, ami hahú korresaun ba pontu ezame lokál. Tuir oráriu, loron 22 Outubru finaliza halo korresaun ba dixiplina sira”, nia adianta.
Entretantu, Diretór Eskola Sekundária Jerál Públiku Suai, Fernando Ferreira, dehan eskola seidauk halo korresaun ba pontu ezame lokál, tanba presiza kumpre oráriu husi Edukasaun.
“Bazeia ba oráriu, hafoin finaliza ezame nasionál no lokál, eskola labele halo kedas korresaun, nune’e ami hahú halo korresasaun ba matéria ezame lokál iha 22 Outubru to’o remata”, nia informa.
Dixiplina ezame lokál ba alunu sekundáriu mak hanesan Jeolojia, Temas, Siénsia Dezenvolvimentu Sosiál (CDS), Malaiu, no Teknolojia Multimídia.
Diretora Servisu Edukasaun Covalima, Elda de Fátima, konfirma katak ba pontu ezame lokál eskola bázika sira halo ona korresaun iha ida-idak nia eskola durante loron tolu, maibé depende husi eskola.
“Eskola iha Covalima finaliza ona ezame nasionál no lokál, nune’e sira halo de’it ona korresaun máteria husi ezame lokál nian, tanba dixiplina ezame nasionál haruka hotu ona bá Ministériu Edukasaun”, dehan.
Eskola ne’ebé realiza ezame nasionál iha Covalima mak hanesan EBC iha 24, eskola sekundária jerál haat no tékniku vokasionál haat.
Totál estudante ne’ebé realiza ezame hamutuk 2.542. Husi númeru ne’e, alunu husi EBC 362, sekundáriu 954 no tékniku vokasionál 226.
Notísia relevante: Alunu na’in-14 iha Covalima falta iha ezame nasionál
Jornalista: Celestina Teles
Editora: Maria Auxiliadora
