DILI, 29 outubru 2024 (TATOLI) – Xefe Departamentu Medisina Interna, Gustavo Rosario da Cruz, hateten pasiente kada loron, fase-raan hamutuk na’in-10 ba leten mak mantein halo tratamentu iha Hospitál Nasional Guido Valadares (HNGV).
“Kada loron pasiente aumenta ba bebeik, tanba ne’e mak HNGV planu ona atu sosa tan mákina fase-raan nian rua iha tinan oin hodi utiliza ba pasiente”, Gustavo dehan ba jornalista sira iha HNGV, ohin.
Xefe Departementu preokupa ho situasaun no kondisaun sidadaun sira-nian iha Timor-Leste tanba la kuidadu aan hodi implika númeru pasiente fase-raan kuaze loroloron tenke rejistu ema na’in sanulu ba leten.
Gustavo esplika, relasiona ho númeru pasiente fase-raan ne’ebé mak kada loron rejistu aas, antes ne’e haruka ba iha rai liur maibé gastu osan barak, entaun Governu liuhusi Ministériu Saúde (MS ) halo ona konstrusaun hodi fó espasu ba pasiente fase-raan nian iha HNGV.
“Ita mós iha ona konstrusaun ne’ebé mak besik ona atu konklui, atu ba pasiente emodialis ne’ebé ita hein bainhira remata ona, pasiente sira ne’e sei ba hotu halo tratamentu iha ne’eba, tanba iha fatin agora ne’e espasu ladún di’ak”, nia esplika.
Iha fatin hanesan, Pasiente Luciano da Silva Marques dehan sei kontinua fase-raan iha sala Neofrolojia, maibé iha espasu ne’e rasik ladún sufisiente.
“Ita haree fatin foun ne’ebé agora hela iha faze konstrusaun maibé seidauk remata, se banhira fatin foun ne’e hotu ona, Ita bele uza ida-ne’e di’ak liu tanba iha ne’e espasu ladún sufisiente”, Luciano da Silva relata.
Totál pasiente fase-raan ne’ebé mak halo hela tratamentu iha HNGV hamutuk 109, husi númeru ne’e mane hamutuk 56 no feto hamutuk 53, pasiente sira ne’e maiora tinan 40 ba leten inklui joven sira ho idade tinan 20 mai kraik.
Jornalista : Felicidade Ximenes
Editór : Zezito Silva
