OÉ-CUSSE, 27 Janeiru 2025 (TATOLI) – Komisaun Nasionál Eleisaun (CNE) nota eleisaun órgaun suku iha Kutete-Monemeko iha Rejiaun Administrativa Espesiál Oé-Cusse Ambeno (RAEOA) la’o di’ak tanba rejista keixa no reklamasaun inklui iregularidade ruma durante festa demokrátiku ne’e.
“Ami-nia pesoál sira destaka hotu iha fatin sentru votasaun haat iha suku Kutete no Monemeko, maibé la simu keixa reklamasaun ruma husi eleitór no kandidatu sira,nune’e eleisaun suku la’o di’ak,” Diretór CNE Oé-Cusse, Tomas Oqui Meta, hateten iha Oé-Cusse, ohin.
Notísia relevante:Eleisaun órgaun suku iha Monemeko hakat ba segunda volta
Diretór CNE ne’e relata hahú husi aprezentasaun kandidatura, votasaun no kontajen inklui apuramentu finál ba rezultadu votasaun la’o di’ak tebes no ema hotu simu rezultadu.
“Ha’u hato’o parabéns ba povu suku rua hanesan Kutete ho Monemeko, tanba komesa husi loron sábadu eleisaun to’o apuramentu iha domingo to’o públika rezultadu eleisaun la’o susesu,” nia agradese.
Eleisaun segundu volta iha 10 fevereiru
Entretantu, Responsavél Tékniku iha Sekretáriu Tékniku Administrasaun Eleitorál (STAE) Oé-Cusse, Grigorio do Santos Neno, afirma kandidatu ba xefe suku iha Kutete ho Monemeko hamutuk sia mak konkore, kompostu husi suku Kutete na’in-tolu no Monemeko na’in-neen, maibé iha apuramentu finál kandidatu ida la liu barreira 50%+1, nune’e kada suku na’in-rua hakat ba eleisaun daruak.
“Ita kontinua ho kandidatu na’in-haat hodi konkorre iha eleisaun volta daruak ne’ebé sei akontese iha loron 10 Fevereiru 2025. Husi Monemeko mak kandidatu Anselmo Coi Sau Noah ho José Sani mak avansa ba segundu volta, no iha suku Kutete mak kandidatu Benjamin Bana no José António Bana, mak avansa ba segundu volta ,” nia dehan.
Entretantu, totál eleitór iha suku Monemeko nian hamutuk 1.288, maibé 895 mak konsege partisipa vota no suku Kutete hamutuk 1.194, maibé 880 mak konsege tuir votasaun.
Notísia relevante:Abitante Kutete ho esperansa xefe suku eleitu garante pás no estabilidade
Jornalista: Abílio Elo Nini
Editór: Florencio Miranda Ximenes
