VIQUEQUE, 28 janeiru 2025 (TATOLI)—Xefe suku Matahoi, postu administrativu Uatulari, munisípiu Viqueque, Antonio Amaral, informa abitante uma kain hitu (7) mak afetadu ba projetu konstrusaun estrada husi postu Uatulari-Viqueque ba suku Laisorulai-Quelicai Baucau.
Notísia Relevante: MOP lansa fatuk dahuluk ba projetu estrada husi Uatulari bá Laisorulai
“Estrada ne’e hahú iha área Belia suku Matahoi, Edmumu to’o Laisorulai ne’ebé lansa fatuk dauluk iha 04 outubru 2024. Nune’e iha área suku Matahoi ne’e, komunidade uma kain sira-ne’ebé afeta ba konstrusaun Estrada ne’e iha uma hitu (7) inklui kioske. Uma sira-ne’ebé afetadu ba projetu ne’e, ha’u rejista hotu ona,” António Amaral hateten ba jornalista sira, iha suku Matahoi, ohin.
Aleinde ne’e, autoridade lokál ne’e rejista mós komunidade nia plantasaun ne’ebé kuda nanis ona besik iha estrada hanesan has, kuluzaka, kulu modo, kulu, hudi no ai-kameli hun ida ne’e nia parte aprezenta on aba Governu.
“Ha’u rejista hotu ona komunidade nia uma no plantasaun ne’ebé afeta ba estrada referida. Dadus sira-ne’e, ha’u aprezenta ba Ministériu Obra Públika (MOP) no empreza Xines hodi haree ita-nia komunidade afetadu sira-nia uma no plantasaun ne’ebé ha’u rejista. Ha’u akompaña ita-nia komunidade afetadu sira husi suku Matahoi koopera di’ak ho empreza sira. Nune’e, iha implemensaun ne’e, ha’u sente laiha impedimentu ruma tanba komunidade nia hakarak esensiál mak estrada. Foin lalais ne’e empreza Xinés ho ekipamentu hamoos tuir dalan área Belia nian, ita-nia komunidade oferese sira-nia plante sira-ne’ebé besik estrata hamos hotu,” nia dehan.
Aleinde ne’e, nia hateten, progresu servisu daudaun ne’e empreza Xinés mobiliza ona sira-nia ekipamentu pezadu no hamoos dalan ninin sira, nomós prepara armazen hodi rai ekipamentu kontrusaun.
Notísia Relevante: KM aprova adjudikasaun kontratu projetu reabilitasaun estrada Uatulari-Laisorulai
“Konstrusaun seidauk la’o maibé ba preparasaun no mobilizasaun ekipamentu pezadu daudaun ne’e iha ona terrenu. Horisehik, 27 janeiru ne’e, Xinés sira fila hotu ba Dili hodi partisipa sira-nia loron tinan foun nian, ne’ebé hahú aban ne’ebé sei ba semana ida iha Dili, depois loron 04 fevereiru, sira sei mai fali iha ne’e,” nia hateten.
Reprezentante komunidade afetadu iha suku Matahoi, António da Silva, haktuir abitante prontu kontribui ba prosesu dezenvolvimentu ne’ebé tama iha postu administrativu Uatulari, nune’e planta no uma ne’ebé afetatadu ba konstrusaun estrada prontu oferese.
“Maibé, Governu hanoin ami fó netik indeminizasaun ruma ba uma no plantasaun, atu ami bele konstrui fila-fali ami-nia uma. Ha’u-nia kioske mak afeta, ne’ebé ami laiha impedimentu ruma ba dezenvolvimentu, apoiu fila-fali fundu ruma ba ami atu ami bele konstrui fila-fali ami-nia uma,” nia dehan.
Antes ne’e, projetu konstrusaun Estrada ne’e lansa direta husi Ministru Obra Públika (MOP), Samuel Marcal, hamutuk ho autoridade munisípiu Viqueque no Autoridade Baucau ne’ebé lansa iha sesta (04 outubru 2024), lansa fatuk dahuluk ba projetu konstrusaun estrada husi Postu Uatulari, munisipiu Viqueque ba Laisorulai, munisipiu Baucau ho distánsia kilometru 22, ne’ebé konstrui husi empreza internasionál Xina Shanghai Konstrusaun.
Projetu konstrusaun estrada ne’e ne’e ho totál r orsamentu hamutuk $18,462,610.14 ho duransaun kontratu hahú loron 18 outubru 2024 no sei ramata iha loron 03 abríl 2026.
Notísia Relevante: Governu sei lansa obra estrada Uatulari kilometru 20-resin iha semana ne’e
Jornalista : Vitorino Lopes da Costa
Editór : Cancio Ximenes
