DILI, 20 Fevereiru 2025 (TATOLI) – Bankada Partidu Demokrátiku (PD) halo koordenasaun ho internál partidu deside ona, Rozenha Fátima de Oliveira Martins, sei substitui Deputadu António da Conceição “Kalohan’’ iha Parlamentu Nasionál (PN).
Iha loron 12 Fevereiru, Prezidente Repúblika, José Manuel Ramos Horta, fó pose ba António da Conceição ‘Kalohan’ hodi asume kardu nu’udar Embaixadór Timor-Leste iha Suisa no Embaixadór ba Nasaun Unida.
“Prezidente partidu deside ona, momentu ita halo koordenasaun ho internál partidu rezultadu, bazea ba lista kandidatu númeru sia, mak sei halo subtituisaun. Agora daudaun karta husi Prezidente Partidu mai ona iha bankada, hein tán karta aseitasaun husi Rosenha no bainhira Rosenha mai aprezenta aan ona, husi bankada halo karta subtituisaun hodi sira na’in-rua asina hato’o ba sekretária atubele fó-sai iha meza Parlamentu,’’Xefe Bankada PD iha PN, Manuel Noronha, informa ba Ajénsia TATOLI iha resintu PN.
Tanba ne’e sei halo subtituisaun ne’e iha plenária iha tempu badak tanba bankada no partidu lakohi nia kadeira mamuk iha PN, tanba ne’e responsabilidade.
Enkuantu, iha lejizlatura daneen ne’e Partidu Demokrátiku (PD) hetan asentu parlamentár ho kadeira neen.
Notísia relevante: https://tatoli.tl/2025/02/14/bankada-pd-koordena-ho-internal-partidu-ba-subtituisaun-deputadu-kalohan/
Jornalista: Nelson de Sousa
Editór: Evaristo Soares Martins
