DILI, 20 Fevereiru 2025 (TATOLI)- Xefe Bankada Partidu Demokrátiku (PD) iha Parlamentu Nasionál (PN), Manuel Noronha, halo retifikasaun katak, substituisaun ba Deputadu António da Conceição ‘Kalohan’, seidauk iha dezisaun husi partidu.
“Ha’u ralat (retifika) fali, informasaun antes iha entrevista kona-ba subtituisaun Deputadu Kalohan, maibé seidauk iha desizaun husi partidu no iha segunda foin iha desizaun no mai iha bankada mak ami bankada halo anúnsiu ba públiku,’’ nia hateten ba Ajénsia TATOLI liuhusi telefónika, ohin.
Antes ne’e iha entrevista, Xefe Bankada PD ne’e hateten, Bankada PD halo koordenasaun ho internál partidu deside ona, Rozenha Fátima de Oliveira Martins, sei substitui Deputadu António da Conceição “Kalohan’’ iha Parlamentu Nasionál (PN).
Iha loron 12 Fevereiru, Prezidente Repúblika, José Ramos Horta, fó pose ba António da Conceição ‘Kalohan’ hodi asume kargu nu’udar Embaixadór Timor-Leste iha Suisa no Embaxadór ba Nasaun Unida.
“Prezidente partidu deside ona, momentu ita halo koordenasaun ho internál partidu rezultadu, bazea ba lista kandidatu númeru sia, mak sei halo subtituisaun. Agora daudaun karta husi Prezidente Partidu mai ona iha bankada, hein tan karta aseitasaun husi Rosenha no bainhira Rosenha mai aprezenta aan ona, husi bankada halo karta subtituisaun hodi sira na’in-rua asina hato’o ba sekretária atubele fó-sai iha meza Parlamentu,’’ nia akresenta.
Tanba ne’e sei halo subtituisaun ne’e iha plenária iha tempu badak tanba bankada no partidu lakohi nia kadeira mamuk iha PN, tanba ne’e responsabilidade.
Enkuantu, iha lejizlatura daneen ne’e Partidu Demokrátiku (PD) hetan asentu Parlamentár ho kadeira neen.
Jornalista: Nelson de Sousa
Editór: Evaristo Soares Martins
