LAUTEIN, 04 Marsu 2025 (TATOLI)—Xefe suku Bauro, postu administrativu Lospalos, munisípiu Lautei, Florindo Miranda, husu Governu hadi’a lalais kondisaun estrada ne’ebé iha Bauro laran ho kondisaun aat hodi difikulta komunidade nia movimentu ba-mai loro-loron.
“Suku Bauro ne’e iha tinan 2024 projetu husi Planu Nasionál Dezenvolvimentu Suku (PNDS) hadi’a ona balun maibé maioria mak seidauk, Hanesan, kondisaun husi Trisula ba Mehara iha kondisaun ne’ebé aat. Ami husu Governu atu reabilita lalais, atu nune’e bele fasilita komunidade nia movimentu kada loron,” Xefe Suku ne’e hateten ba Agência TATOLI, iha Bauro tersa ne’e.
Nia dehan, estrada ligasaun Trisula ba Mehara iha hela prosesu atu halo re-abilitasaun maibé to’o ohin loron seidauk iha reziltadu pozitivu.
“Estrada Trisula ba Mehara iha ona prosesu nia laran, maibé ami hein nafatin. Hanesan autoridade lokál husu nafatin ba Governu atu aselera prosesu ne’e, tanba komunidade iha ne’e preokupa liu mak estrada,” nia dehan.
Nia hatutan, iha semana kotuk, Primeiru-Ministru Kay Rala Xanana Gusmão ho Ministru Obra Públiku (MOP) Samuel Marçal realiza ona diálogu ho komunidade Lautein atu nune’e iha futuru Governu halo alargamentu ba estrada hotu iha Lautein laran no husu komunidade bele koopera.
“Problema estrada mak foin lalais mós ita-nia Primeiru-Mimistru ho nia ekipa sira mai halo sensibililizasaun ba komunidade Lautein sira hotu, atu hadi’a estrada aban bainrua Governu atu halo alargamentu Estrada afeta ba komunidade sira-nia uma, ai-horis balun karik tenke koopera tanba halo di’ak ba ita, no-mós ba nia indiminizasaun sira-ne’e nia prosesu hanusa komunidade sira rona direta kedan,” nia dehan.
Maibé, iha suku Bauro nia laran estrada ne’ebé grave mak, Luarai liga ba Nanfoe, husi Sepelata liga ba Nanafoe no Nanafoe ba Somoxo iha kondisaun ne’ebé grave.
“Estrada hirak ne’e kondisaun grave, maibé proposta ami hatama ona maibé sei iha prosesu nia laran, konforme ita-nia Governu atu aprova uluk ida ne’ebé, tanba iha nia dezenvolvimentu ne’e la’o tuir etapa tanba problema estrada ne’e la’ós iha suku Bauro mak enfrenta maibé teritoriu hotu enfrenta,” nia afirma.
Entretantu kona-ba bee-moos, tuir programa PNDS iha tinan 2024 sikúlu neen konklui ona hein de’it komunidade asesu.
“Kona-ba bee-moos programa PNDS 2024 sikúlu neen ita konklui ona, hein de’it komunidade sira utiliza, ida mak iha Nanafoe rasik, ida iha Somoxo no ida iha Motara, ne’ebé bee-moos laduun iha ona difikuldade,” nia hateten.
Tuir dadus ne’ebé iha aldeia iha Suku Bauro hamutuk lima no Sub-aldeia tolu mak hanesan, Motara, Nanafoe no Trisula. Enkuantu aldeia lima (5) ne’e mak hanesan, Sepelata, Bauro, Ira-Lafai, Somoxo no Luarai.
Suku Bauro ho nia populasaun hamutuk, 3,990 no maioria populasaun iha Suku referidu moris ho vida agrikultura.
Jornalista : Hortencio Sanchez
Editór : Cancio Ximenes
