BOBONARU, 26 Maiu 2026 (TATOLI)—Komité Paralimpiku Nasionál Timor-Leste (CPNTL, sigla Portugues), segunda ne’e, koloka pontu fokál ida iha munisípiu Bobonaru hodi identifika no promove desportu ba Ema ho Defisiénsia (EhD) sira atu prepara-aan sai atleta foun.
Notísia Relevante:Teofilo ho kondisaun defisiénsia foti oin Timor-Leste iha eventu internasionál
Prezidente CPNTL, Mateus Lucas, afirma Munisípiu Bobonaru iha poténsia Ema ho Defisiénsia, maibé durante ne’e partisipasaun iha eventu nasionál no internasionál mínimu liu.
“Kada tinan atleta ema ho defisiénsia sira sempre ba rai-li’ur, durante ne’e CPNTL lori atleta husi munisípiu Dili de’it, entaun agora CPNTL loke liras iha munisípiu sira hotu, nune’e servisu hamutuk ho xefe joventude, na’i-ulun sira iha munisípiu, atu promove no kaderiza atleta foun. Nune’e, bele substitui atleta sira-ne’ebé mak idade avansadu ona,” Mateus Lucas hateten iha nia intervensaun ba atividade ne’ebé realiza iha salaun Maria-Tapo, segunda ne’e
Nia afirma, pontu fokál ne’e sei servisu hamutuk ho Sentru Joventude, Líder komunitária, autoridade Munisipál no Organizasaun Naun-Governamentál (ONG) lokál sira hodi akumula no kapasita EhD iha área desportu to’o área rurál, hodi prepara sira atu ba kompete iha eventu nasionál no internasionál ne’ebé sei realiza iha futuru.
Foin lalais, nia hateten, CPNTL realiza atividade festivál iha Dili hodi buka atleta foun, atu kaderiza sira hodi prepara partisipa eventu internasional ne’ebé sei realiza tinan oin iha Thailandia, maibé atividade ne’e la konsege involve EhD husi munisípiu Bobonaru.
“Ohin loron, ha’u to’o iha ne’e estabelese pontu fokál iha ne’e, para Bobonaru tama iha laran. Depois, tinan oin, ita halo mudansa uitoan-uitoan to’o Munisípiu 13, ita-nia pontu fokál iha ne’e para atu halo desportu ba ema ho Defisiénsia ho di’ak. Atu nune’e, ba futuru Ema ho Defisiénsia labele hela iha kotuk, konta ho ami Defisiénsia iha nasaun iha ne’e ita hotu bele” Nia katak
Sekretáriu Autoridade Munisípiu Bobonaru ba asuntu Sosiál no Organizasaun Komunitária, Julio Carvalho Caeiro, hato’o agradesimentu ba CPNTL tanba hahú fihir no fó oportunidade ba EhD munisípiu Bobonaru ne’ebé iha talentu ba desportu.
Nia haktuir, iha tinan hirak liuba atleta EhD Bobonaru oan nain-rua ba partisipa iha eventu Maratona nivél nasionál no internasionál, maibé hafoin ne’e paradu to’o agora.
“Ami agradese tebes ba CPNTL ne’ebé ohin loron loke nia ramun ida iha Munisípiu Bobonaru. Ami prontu koopera no Kolabora, ami mós prontu prepara fatin ba pontu fokál ne’e para bele elabora, tanba ita iha munisípiu Bobonaru ne’e maluk Defisiensia sira barak hela, maibé seidauk tau-matan,” nia dehan.
Nia argumenta, presiza fó oportunidade barak ba EhD tanba sira mós iha kapasidade no talentu iha área oioin.
“Ita haree realidade hatudu katak Ema ho Defisiénsia balun matenek-liu fali ema normál. Ha’u aprezsa ho Asesór Prezidente Repúblika, Gaspar, ho kondisaun hanesan mai kuandu iha enkontru ruma nia ko’alia di’ak loos liu fali ha’u, lahatene, estuda iha ne’ebé, eskola iha ne’ebé, ida-ne’e hatudu katak sira mós iha kapasidade,” Tenik Caerro
Aleinde ne’e, Koordenadór Advokasia Asosisaun Halibur Defisiénsia Rejiaun Oeste, Maria Fátima Gouveia, orgullu no konsidera serimónia ne’e hanesan pasu importante no oportunidade di’ak tebes ba EhD Munisípiu Bobonaru atu promove sira-nia talentu.
“Ida-ne’e bele promove ami-nia maluk Defisiénsia sira atu sai atleta. Ami-nia maluk sira barak mak iha talentu hanesan joga-bola, halai, natasaun, sira iha talentu oioin maibé durante ne’e laiha atividade. Ha’u hanoin ida-ne’e oportunidade di’ak tanba maluk defisiénsia sira mós iha esperiénsia no vontade atu partisipa iha atividade saida de’it,” nia afirma.
Daudaun ne’e, CPNTL koloka ona pontu fokál iha Munisípiu haat hanesan Lautéin, Vikeke, Baukau no munisípiu Bobonaru.
Notísia Relevante: CPNTL konsege prodús atleta potensiál sira iha “Festivál Nasionál Desportu Paralímpiku”
Jornalista : Sergio da Cruz
Editór : Cancio Ximenes
