BOBONARU, 28 Maiu 2025 (TATOLI)—Diretór Sekretáriu Tékniku Administrasaun Eleitorál (STAE) munisípiu Bobonaru, Mariano Viegas Amarál, konfirma diresaun jerál fó ona orientasaun katak hahú fulan-Juñu 2025 ne’e tékniku sira bele kontinu atividade produsaun kartaun eleitorál Biométriku ba eleitór sira-ne’ebé rejistu ona dadus iha sistema maibé to’o agora sei pendente ka seidauk simu kartaun.
Nia akresenta hahú iha Janeiru to’o kuarta (28 Maiu 2025) ne’e STAE Munisípiu Bobonaru konsege halo atendementu Resensiamentu Eleitorál no Atualizasaun Baze de Dadus (RE-ABD) ba eleitór 6,403 ne’ebé kompostu husi eleitór foun 566 no tuan 5,837.
Diretór ne’e fundamenta husi númeru ne’e eleitór 15% mak foin hetan kartaun eleitorál ho baze Biométriku enkuantu eleitór ne’ebé rejistu hahú husi loron 06 Favereiru 2025 ne’e to’o agora maioria seidauk simu tanba blanko estoke hotu.
Notísia Relevante: Abríl, STAE Bobonaru sei hala’o rejistu movél kartaun Biométriku ba EhD
“Agora ami iha ona Informasaun husi ami-nia diresaun jerál katak iha tempu besik ne’e blanko sei mai no sei distribui mai iha munisípiu. Hahú Juñu ne’e sei prodús kartaun eleitorál no entrega ba eleitór sira-ne’ebé halo kartaun eleitorál ho baze biométriku,” Nia informa ba jornalista sira, ihania kna’ar fatin, kuarta ne’e.
Maske blanku laiha maibé Diretór Mariano Viegas Amarál nafatin husu ba eleitór sira atu kontinua hakbesik mai edifisíu STAE Munisípiu Bobonaru hodi halo REABD ba kartaun eleitorál ho baze Biométriku.
Nia hatutan, daudaun ne’e odomatan STAE Munisípiu Bobonaru sei kontinua loke tuir oras servisu hodi halo atendimentu ba eleitór sira husi suku 50, postu administrative neen (6).
“Ita-boot sira update ona, ita-boot sira-nia dadus. Bainhira kartaun iha, hein prodús sai de’it ona nune’e ita-boot sira bele kaer ona kartaun eleitorál ho baze biométriku,” nia dehan.
Diretor ne’e afirma, STAE Bobonaru planeia iha tinan ne’e halo atendimentu REABD kartaun biométriku ba postu administrativu no suku ne’ebé identifikadu, maibé to’o agora seidauk realiza tanba sei hein orientaun husi diresaun jerál.
“Ita nia alvu ne’e ba iha idozu no ema ho defisiénsia sira depois ramata mak ita kontinua ba sira-ne’ebé ho kondisaun normal,” nia haeten.
Sorin seluk, Eleitór suku Holsa, Manuel da Costa Clau husu ba diresaun jerál atu aselera distribuisaun blanko mai STAE Munisípiu tanba eleitór barak mak hein hela atu simu kartaun biométriku.
“Ami mai urus iha 07 Abril to’o agora mós seidauk foti, ami mai beibeik dehan blanko mak laiha. Ha’u hela iha Maliana mós hanesan, imajina sira hela iha Lolotoe ba-mai mak laiha hela de’it ne’e susar. Gasta osan barak, depois estrada ladi’ak tan,” nia dehan.
Tuir observasaun iha terrenu nota katak, eleitór barak mak kada loron kontinua mai rejistu no konfirma kona-ba bainhira mak atu hetan kartaun ho baze biométriku.
Notísia Relevante: STAE pendente hela eleitór 33.622 tanba blanku biométriku hotu
Jornalista : Sergio da Cruz
Editór : Cancio Ximenes
