BOBONARU, 06 Marsu 2025 (TATOLI)—Diretór Sekretariadu Tekniku Administrasaun Eleitorál (STAE) Munisípiu Bobonaru, Mariano Viegas Amaral, hateten tuir orientasaun husi Diresaun Jerál katak hahú fulan-Abríl 2025, ekipa tékniku STAE nian sei tun ba baze halo atividade rejistu movél kartaun eleitorál Biométriku ba Ema ho Defisiensia (EhD) no idozu sira.
Notísia Relevante: STAE hahú prodús kartaun eleitorál Biométriku iha Bobonaro
Nia hatutan, daudaun ne’e atendimentu sei sentraliza de’it iha nivél Munisipál, maibé tuir planu iha tempu badak sei halo sensibilizasaun ba líder komunitária sira atu fahe informasaun ba komunidade molok implementa programa rejistu movél iha nivél postu administrativu no suku.
“Ita ba atende uluk sira mak ita kontinua ba ema ho kondisaun normal sira. Ba atividade ne’e, ami sei hala’o uluk sensibilizasaun ka hato’o informasaun ba líder komunitária sira liu-liu xefe suku no Xefe aldeia, para sira bele hatene tuir no pasa imformasaun ba komunidade. Nune’e, para ami ba ne’e komunidade bele konsentra iha fatin ne’ebé ita atu rejistu ba ne’e,” Nia informa ba Jornalista sira, iha kna’ar fatin, kinta ne’e.
Nia relata, dadus hahú husi fulan-janeiru to’o Fevereiru 2025 ne’e, Sekretariadu Tékniku Administrasaun Eleitorál (STAE) Munisípiu Bobonaru halo ona atendimentu resenseamentu kartaun eleitorál Biométriku ba eleitór hamutuk na’in-4,663 kompostu husi eleitór foun 370 no tuan 4,285.
Husi totál eleitór ne’ebé rejista iha fulan-Fevereiru husi loron (03/02) to’o loron (06/02) ne’e ágora simu hotu ona kartaun, enkuantu sira-ne’ebé rejistu husi loron (10/02) ba leten to’o ágora seidauk simu kartaun tanba seidauk hetan aprovasaun husi sistema iha sentrál.
“Ho razaun sistema Biométriku ne’e, dadus hotu-hotu ne’ebé sistema Biométriku iha munisípiu rejista sei hetan hotu rekoñesimentu ba sistema sentrál, verifika dadus ne’e didi’ak. Prosesu tiha depois aprova ona mak bele Print Out, entaun ba sira-ne’ebé rejistu iha loron 20 Fevereiru ba leten ne’e seidauk bele foti tanba sei iha prosesu nia laran,” nia dehan.
Eleitór husi suku Odomau, Nelson Angelo de Jesus, hateten maske hein kle’ur maibé nia observa atendimentu ne’ebé ekipa tekniku sira halo ne’e tuir duni prosedimentu normál.
“Ami sente buat hotu la’o tuir nia dalan. Ami hein kle’ur, maibé tenke pasiénsia tanba ema barak. Ida-ne’e trata foun fali la hanesan uluk. Ha’u husu ba STAE nafatin halo atendementu di’ak, lalika iha familiarizmu maibé atendementu tenke hanesan ba ema hotu,” nia dehan.
Sistema biométriku nu’udár medida ida-neʼebé STAE introdús hodi identifika eleitór sira-nia autentifikasaun pesoál liuhosi kódigu karaterístika fíziku iha impresaun dijitál.
Sistema ne’e implementa atu moderniza sistema resenseamentu eleitorál ba dijitál, hasa’e grau akurasaun dadus ema idak-idak nian, evita fraude manipulasaun dadus eleitorál ne’ebé bele implika ba iha prosesu eleisaun tuir mai.
Tuir dadus husi STAE eleitór rejista iha munisípiu Bobonaru hamutuk na’in-75,351 ne’ebé kompostu husi mane hamutuk 38,731 no feto hamutuk 36,620.
Notísia Relevante: STAE Bobonaro rejista eleitór foun na’in-6.289
Jornalista : Sergio da Cruz
Editór : Cancio Ximenes
