DILI, 16 Abríl 2025 (TATOLI)-Sekretariadu Tekniku Administrasaun Eleitorál (STAE), sei pendente hela eleitór 33.622 hodi hein kartaun eleitorál biométriku.
“Númeru ida-ne’e mak sei pendente hodi hein blanku biométriku ne’ebé ami prosesa daudaun ona”, Direitór Jerál STAE, Elviro Fernandes, hatete ba TATOLI iha nia knaar fatin, Kaikoli, kuarta ne’e.
Tuir dadus jerál husi STAE eleitór sira ne’ebé seidauk emprime sira-nia eleitorál ba biométriku husi munisípiu Aileu iha 2.946, Ainaru 2.113, Ataúru 282, Baukau 4.001, Bobonaru 3.098, Kovalima 2.059, Dili 5.912, Ermera 987, Lautein 1.711, Likisá 2.310, Manatutu 2.000, Manufahi 1.186, Oekusi 546, Vikeke 1.307, no STAE Nasional 3.164.
“Espera kartaun biométriku rihun-200 ne’e atende to’o Abríl 2026. Ami halo jestaun ba eleitór sira ne’ebé foun ita labele halo buat ida, maibé eleitór sira ne’ebé mai atualiza sira-nia kartaun no renova ami simu nafatin no bainhira sira mai atu foti kartaun foun mak foin entrega ida tuan. Situasaun ida-ne’e mak ami bele halo”, Diretór informa.
Tinan ne’e osan ne’ebé aloka ba imprensaun ba kartaun eleitorál biométriku hamutuk $240.780.
Totál eleitór ne’ebé asesu ona ba biométriku ne’e hamutuk 132.162. Munisípiu Aileu iha 9.620, Ainaru 8.187, Ataúru 2.080, Baukau rihun 12-resin, Bobonaru 9.282, Kovalima 7.271, Dili rihun 35-resin, Ermera 7.966, Lautein 7.232, Likisá 7.944, Manatutu 9.236, Manufahi 5.871, Oekusi 4.403 no Vikeke 6.070.
Notísia relevante: STAE sei prodús tan blanku rihun-200
Jornalista : Osória Marques
Editora : Rita Almeida
