DILI, 26 Juñu 2025 (TATOLI)—Tribunál Judisiál Primeira Instánsia Dili, liuhusi Juiza Francisca Cabral, kinta ne’e, hatuun despaxu ikus hodi aplika medida koasaun aprezentasaun periódika (AP) ba arguidu na’in-lima ne’ebé envolve grupu Na’okteen Króniku (NAKRO) ne’ebé foin daudaun ne’e tama loja ida iha área Fatuhada hodi foti-subar telefone.
Ba prosesu interrogatóriu dahuluk ba arguidu sira-ne’e, iha na’in-rua mak Tribunál labele halo julgamentu tanba minoridade, enkuantu arguidu na’in-lima seluk Tribunál admite hodi prosede ba interrogatóriu dahuluk. Nune’e, arguidu na’in-lima mak Tribunál aplika medida koasaun aprezentasaun periódika atu aprezenta aan iha Eskudra Polísia ne’ebé besik, hahú husi loron segunda to’o iha domingu.
Notísia relevante:Polísia detein suspeitu na’in-hitu ne’ebé envolve iha grupu NAKRO
Tuir Advogadu Privadu, Agustinho de Jesus katak kazu ne’e tuir loloos Defensór Públiku mak kaer, maibé arguidu ida maka fó prokurasaun ba advogadu, tanba ne’e mak iha despaxu ne’e defensór sira la marka prezensa, entaun advogadu mak rona hotu despaxu husi Tribunál ba kazu ne’e.
Nia dehan, Ministériu Públiku promove arguidu sira mai Tribunál ho krime furtu no Tribunál komunika kedas bá arguidu sira-nia inan-aman, para bele fó hanoin atu eduka no hanorin sira-nia oan.
Prosesu ne’e, prezide husi Juíz Turnu, Francisca Cabral, Ministériu Públiku reprezenta husi Prokuradór António Tavares, arguidu sira hetan asisténsia legál husi Defensór Públiku, Eustaquio Guterres, Manuel Exposto no Advogadu Agustinho de Jesus.
Jornalista: Natalino Costa
Editór: Xisto Freitas da Piedade
