VIKEKE, 02 Jullu 2025 (TATOLI)—Xefe Suku Afaloikai, Postu Administrativu Uatukarbau, Munisípiu Vikeke, Abílio Soares, informa kondisaun estrada liga ba suku iha Postu Administrativu Uatukarbau agora daudaun difikulta tebes ba implementasaun Programa Nasionál Dezenvolvimentu Suku (PNDS).
“Kondisaun estrada ba ami-nia suku ne’e difisil ba transporte sira atu asesu, difikulta mós programa PNDS sira-ne’ebé implementa iha ami-nia suku. Obra PNDS ba tinan 2025 ami kontinua halo estrada sertu no morru protesaun ba eskola Ensinu Báziku 28 Novembru nian, maibé ami seidauk bele implementa tanba kondisaun estrada no tinan kotuk mós hanesan ami la konsege implementa, nune’e orsamentu filafali ba kofre Estadu,” Abílio Soares ba TATOLI, iha Postu Uatukarbau, kuarta ne’e.
Tanba ne’e, Autoridade Suku Afalokai ne’e husu Governu tau-matan ba estrada sira-ne’e hodi fasilita komunidade no obra PNDS ne’ebé implementa iha suku.
“Ha’u husu ba Governu tau-matan ba infraestrutura estrada ne’ebé liga bá suku hodi fasilita komunidade, atu labele difikulta komunidade no programa PNDS sira tanba tinan kotuk ami implementa tarde, orsamentu filafali bá kofre Estadu. Entaun, ita-nia povu mak lakon,” nia hato’o.
Iha fatin hanesan, Adiministradór Postu Uatukarbau, Munisípiu Vikeke, Anacleto Dautel Sarmento, haktuir kondisaun estrada liga husi Munisípiu Vikeke to’o iha Postu Uatukarbau aat, kuaze ema hotu hatene no sente kondisaun estrada ne’e difikulta movimentu sira.
“Kondisaun estrada Vikeke to’o postu ne’e kondisaun aat ema hotu hatene. Governu mós hatene kondisaun estrada ne’e. Nune’e, ami halo ona pedidu ba ministériu relevante nune’e bá futuru bele tau ba atensaun. Ami iha esperansa katak kondisaun estrada aat ne’e Governu bele konstrui,” nia tenik.
Tuir dadus, populasaun Postu Uatukarbau totál hamutuk 10.889, kompostu husi suku neen no aldeia hamutuk 30.
Jornalista: Vitorino Lopes da Costa
Editór: Xisto Freitas da Piedade
