VIKEKE, 09 Jullu 2025 (TATOLI)—Vise-Ministra Finansa, Felícia Claudinanda Cruz Carvalho ho ekipa akompañadu husi Prezidente Autoridade Munisípiu Vikeke vizita turizmu komunitáriu Weluli Manas lokalizadu iha Suku Uaimori, Postu Administrativu Vikeke Vila.
Iha vizita ne’e, Vise Ministra Finansa ho ninia komitiva sira observa bee-matan ne’ebé manas no haree fasilidade sira-ne’ebé iha Weluli Manas.
Iha observasaun ne’e, Vise-Ministra Finansa hateten turizmu komunitáriu Weluli Manas autoridade pesiza tau planu hodi dezenvolve tanba ne’e fó reseita bá Munisípiu Vikeke bainhira akontese desentralizasaun.
“Tanba fatin Weluli Manas furak, preiza tau solár panél atu tempu kalan bele fó naroman, koloka mós ema hodi hein iha sítiu ne’e. Problema kondisaun estrada mak seidauk di’ak. Kuandu estrada di’ak, sei atrai tebes mai vizita iha sítiu ida-ne’e,” Felícia Claudinanda Cruz hateten, iha Weluli Manas, kuarta ne’e.
Governante ne’e dehan, atu dezenvolve sítiu turizmu komunitáriu Weluli Manas ne’e depende ba Autoridade Munisípiu Vikeke mak tau ba planu prioridade munisípiu nian no konsidera katak fatin turizmu sira hanesan ne’e ba futuru ema vizita fó reseita.
Iha fatin hanesan, Prezidente Autoridade Munisipál Vikeke, Francisco C. S de Gonzaga Soares, haktuir, sítiu ne’e maski iha ona fasilidade balun, maibé presiza halo manutensaun no presiza hadi’a lampu sira-ne’ebé iha sítiu laran.
“Ha’u hanoin turizmu ida-ne’e ita presiza hadi’a hodi halo promosaun ba públiku atu ema bele mai vizita. Maibé, agora daudaun ne’e kondisaun estrada mak sei aat hodi difikulta ema atu mai vizita. Tan ne’e, ita presiza kondisaun sira hanesan estrada, ponte hodi hasa’e poténsia turizmu, nune’e ita labele depende ba setór sira seluk,” autoridade ne’e hato’o.
Aleinde ne’e, nia dehan, estadu presiza deklara iha munisípiu ka nasionál katak tinan ida-ne’e fó prioridade ba dezenvolvimentu setór turizmu.
“Ha’u hakarak ne’e dezenvolve fatin turizmu ne’e iha nivel nasionál para dikusaun orsamentu ita bele ko’alia poténsia turizmu sira, nune’e iha munisípiu mós la’o tuir matadalan ne’ebé nasionál iha,” nia tenik.
Francisco sei koordena ho Diresaun Jestaun Merkadu no Turizmu Munisipál hodi haree ema ruma koloka iha fatin turizmu Weluli Manas, hodi tau-matan ba fasilidade sira-ne’ebé iha Weluli Manas.
Iha vizita ne’e, hetan partisipa husi ekipa vise MF, Komadante Polísia Nasionál Timor- Leste (PNTL) Munisípiu Vikeke, Komadante Eskuadra Polísia Postu Vikeke Vila no autoridade lokál sira.
Jornalista: Vitorino Lopez da Costa
Editór: Xisto Freitas da Piedade
