DILI, 21 Jullu 2025 (TATOLI)–Kompetisaun Voleiból Praia Mista iha Jogu Desportivu Komunidade País Lian Portugés (CPLP-sigla portugeza) ne’ebé hala’o iha kampu Voleiból Praia, Portugál hetan pontu 42 no Kabuverde 18.
Iha jogu ne’e, ekipa Portugál dominan kampu no esforsu ne’ebé másimu hodi halakon nia adversáriu Kabuverde ho set rua tutuir malu.
Set dahuluk Portugál ho pontu 21 no Kabuverde ho de’it pontu hitu (7) no hakat ba set daruak Portugál nafatin ho pontu 21 no Kabuverde iha 11.
Jogu ne’e lidera husi árbitu José Celestino no Carmonezia da Silva. Enkuantu selesaun Portugál mak Filipe Neto no Matilde Silva. Hosi Kabuverde mak Denzel Ramos no Catarina Fonseca.
Jogadór Portugál, Filipe Neto, sente kontente tanba hetan vitória dala ida tan ho adversáriu Kabuverde.
“Ami kontente ho vitória ne’e no hakat ida tan bá-oin. Ami-nia objetivu prinsipál mak remata dahuluk nune’e ami bele iha tempu ne’ebé fásil liu iha semi-finál sira,” nia dehan ba TATOLI iha Bidau-Lesidere, Segunda ne’e.
Notísia relevante : Voleiból Praia : ekipa mane Timor-Leste hamate set rua tutuir malu hasoru Angola
Nia hatutan ekipa Portugál ho nia maneira rasik oinsá halai sai buka bola no remata hodi hamate bola hosi adversáriu.
“Maneira ne’ebé ami halo, ami sente fiar-aan tebes katak ami bele manán jogu duplu mistu sira-ne’e. Jogu sira la’o di’ak. Ami nunka hasai ami-nia ain hosi gás. Ami sempre dudu atu hetan marjen ida-ne’ebé boot liu hodi fó konfiansa liubá ami-nia aan iha ami-nia jogu. Ha’u fiar duni katak ekipa portugés ne’e sei manán jogu duplu mistu sira,” Filipe informa.
Filipe Neto haklaken jogu ne’e presiza treinu loron-loron no fó tempu barak inklui presiza fasilidade sufisiente nune’e bele atinje objetivu.
“Atu hetan xamada (bolu) bá selesaun nasionál, ita presiza fó ita-nia tempu loron-loron, iha sesaun treinu hotu-hotu, iha jogu hotu-hotu, atu iha-ne’e, iha-ne’ebé ita iha atu reprezenta ita-nia rai no atu manán medalla sira,” nia subliña.
Jornalista : Osória Marques
Editora : Julia Chatarina
