DILI, 21 Jullu 2025 (TATOLI)—Iha ámbitu Jogu Desportivu Komunidade País Lian Portugés (CPLP, sigla portugés) ba dala-XII, loron daruak, ekipa mane Timor-Leste hamate set rua tutuir malu kontra ekipa mane husi Angola.
Set dahuluk, Timor-Leste ho pontu 21 no Angola iha pontu 19, iha set daruak Timor-Leste hamate ho pontu 21 no Angola iha 16.
Árbitu ba jogu ne’e maka Alvaro husi Mozambike no Gomes husi Portugál. Enkuantu, jogadór husi Timor-Leste mak Noe Siqueira no Felizberto Faria, enkuantu husi Angola mak Texeiro Voz no Ruben Campos.
Notísia relevante : Miguela no Noeh lori Timor-Leste manán iha kompetisaun voleiból mistu
Jogadór Timor-Leste, Felizberto Faria, iha esperansa liuhusi vitória ida-ne’e bele haforsa liután iha jogu tuir mai.
“Ha’u kontente tebes tanba bele halakon ekipa husi Angola hodi bele tama ba semi-finál. Espera jogu tuir mai ami bele manán nafatin hodi lori medalla ba ita-nia rai doben Timor-Leste,” nia espresa.
Atleta ne’e dehan, presiza treinu másimu nune’e bele hetan rezultadu di’ak iha semi-finál.
“Presiza treinu másimu nune’e bele hadi’a liután ami-nia jogu iha Voleiból Praia tuir mai. Tanba ami sei iha fallansu ne’ebé enfrenta mak iha servis no simu bola. Ida-ne’e tenke iha mentalidade ne’ebé di’ak,” nia katak.
Nia konfesa, fasilidade sufisiente ona maibé presiza treinu no hadi’a mentalidade iha kampu.
“Ita foin hahú ho jogu desportivu Komunidade País Lian Portugés, entaun ida-ne’e hanesan buat foun mai ita iha kampu, presiza hadi’a liután,” Felizberto Faria, katak.
Treinadór atleta mane, Felisano da Costa Soares, dehan, importante ba atleta sira atu hatudu disiplina.
“Ida-ne’e pasu ba ita hodi hakat ba oin, ne’ebé ami-nia esperansa katak ami tenke hatudu buat ne’ebé di’ak no importante mak hatudu disiplina iha kampu,” nia hato’o.
Jornalista : Osória Marques
Editora : Julia Chatarina
