OEKUSI, 25 Jullu 2025 (TATOLI) – Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), sei envolve Asosiasaun Halibur Defisiénsia Oekusi (AHDO) iha ámbitu diseminasaun ba atividade polisiamentu suku nian, hodi indtrodus kna’ar no kompeténsia liuliu utilizasaun terminolojia Ema ho Defisiénsia (EhD) ba komunidade sira iha suku no aldeia, nune’e labele mosu diskriminasaun iha públiku.
Notísia relevante:PNTL Oé-Cusse sensibiliza kn’aar polisiamentu komunitária ba komunidade Nítibe
Komandante PNTL Oekusi, Superintendente Polísia, Angelo Quelo, informa, planu ne’e PNTL komunika ona Asosiasaun Halibur Defisiénsia Oekusi, atu labele hamosu ofensaun ba Ema ho Defisiénsia sira.
“Linguajen defisiénsia ne’e, presiza transmite ba iha ema hotu hodi apar, tanba linguajen baibain ema bolu defisiénsia ne’e, ita tenke esplika ba komunidade sira, atu ita labele ábitua ho liafuan sira-ne’ebé fó triste ba maluk sira (EhD). Tan ne’e mak ami sei apoia sira, kuandu iha sensibilizasaun polísia komunitária iha suku, presiza lori sira, atu esplika direita hahú husi suku no aldeia mai to’o vila, liuliu mós ba polísia rasik, tenke hatene uluk linguajen ne’e kuandu ita bolu maluk Ema ho Defisiente tenke respeita atu labele hakanek sira-nia hanoin ho fuan, tanba kondisaun ne’ebé enfrenta, ne’e kriatura Maromak nian,” nia ko’alia iha Oekusi, ohin.
Komandante PNTL ne’e mós, informa, liuhusi oportunidade fahe informasaun iha suku no aldeia, aproveita mós bele halo rejistasaun ba Ema ho Defisiénsia sira-ne’ebé tinan barak seidauk rejista atu hetan tulun ruma husi entidade relevante sira.
“Ita haree iha Pássabe, Nítibe no Oésilo, barak mak seidauk rejista, barak mós seidauk hetan tulun husi Governu, entaun liuhusi sosializasaun ne’e, bele foti kedas sira-nia dadus, atu submete ba parte relevante sira hodi tau matan,” nia hateten.
Notísia relevante:AHDO husu Autoridade RAEOA apoia fatin ba Ema ho Defisiénsia
Diretora AHDO Pasquela Cofitalan, orgullu tanba presiza introdus terminolojia loloos kona-ba Ema ho Defisiénsia ba públiku, tanba durante ne’e, seidauk halo sensibilizasaun ba to’o suku no aldeia sira.
“Kona-ba planu husi Komandu PNTL atu lori ami iha sosializasaun polisiamentu komunitáriu, ami AHDO prontu atu la’o hamutuk, atu introdus kona-na terminolojia, tanba maioria Ema ho Defisiénsia seidauk asesu ho di’ak ba terminolojia atu dignu ba Ema ho Defisiénsia, tanba ne’ebé ami sei koopera tanba durante ami-nia difikuldade ida mak transporte atu bele ba to’o maluk sira iha suku no aldeia
Jornalista: Abílio Elo Nini
Editór: Rafael Ximenes de A. Belo
