OEKUSI, 21 Jullu 2025 (TATOLI) – Asosiaun Halibur Defisiénsia Oekusi (AHDO) rekomenda ba Autoridade Rejiaun Administrativa Espesiál Oekusi Ambeno (RAEOA) atu apoia hela fatin própriu nune’e bele fasilita formasaun ba Ema ho Defisiénsia (EhD) sira iha Oekusi.
Diretora Asosiaun Halibur Defisiénsia Oekusi, Pasquela Cofitalan, hato’o rekomendasaun ne’e, iha ámbitu audénsia ho Sekretária Rejionál Edukasaun no Asuntu Sosiál iha salaun administrasaun Numbei, ohin.
Tuir nia, dadus provizória ne’ebé Asosiaun Halibur Defisiénsia Oekusi rekolla ona hamutuk 349, enfrenta defisiénsia ho tipu oioin no barakliu mak seidauk asesu formasaun iha letra brail no lian jestuál, tanba iha Oekusi seidauk iha fatin ba formasaun.
“Ami husu liuliu kona-ba fatin, tanba daudaun ne’e ami uza temporáriu de’it, ne’ebé ami hanoin iha futuru presiza fatin dignu, nune’e ami bele akumula ami-nia maluk defisiénsia sira, atu bele asesu ba formasaun letra brail nian, no asesu mós ba formasaun lian jestuál, tanba ami-nia rezultadu observasaun iha Oekusi, barak mak seidauk asesu formasaun liuliu kolega defisiénsia matan tanba seidauk iha sentru formasaun letra brail nian iha Oekusi,” nia dehan iha Oekusi, ohin.
Notísia relevante:AHDMTL hakarak kria sentru formasaun ba ema ho defisiénsia matan iha Oekusi
Iha fatin hanesan, Octoviano da Silva, reforsa-tan, objetivu husi audénsia mak AHDO hakarak relata sai preokupasaun sira-ne’ebé durante ne’e Ema ho Defisiénsia enfrenta.
“Ami husu tanba iha Oekusi seidauk iha fatin própriu ida ba ami, entaun liuhusi enkontru ohin ami sujere, se bele aselera hela fatin ida mai ami, nune’e ami bele iha edifísiu rasik atu halibur ami-nia maluk sira barak iha nível suku no aldeia, seidauk hetan tulun,” nia sujere.
Notísia relevante: https://tatoli.tl/2025/02/24/autoridade-raeoa-apoia-nesesidade-bazika-ba-ema-ho-defisiensia-iha-pante-makasar/
Hatan ba rekomendasaun ne’e, Sekretária Rejionál Edukasaun no Asuntu Sosiál, Inácia Tamele, informa, konsidera rekomendasaun ne’e importante, nune’e sei relata ba Prezidente Autoridade RAEOA.
“Ita-nia maluk Ema ho Defisiente sira-nia nesesidade hanesan, hakarak atu harii sentru atu fornese kualker formasaun saida de’it, sira labele muda ba mai, ida-ne’e ami sei esforsa tanba ami sei hato’o ba Prezidente Autoridade RAEOA atu haree preokupasaun ne’e,” nia dehan.
Notísia relevante: https://tatoli.tl/2025/07/04/deputadu-solisita-ba-governu-konsidera-inkluzaun-ehd-iha-dezenvolvimentu-nasional/
Jornalista: Abílio Elo Nini
Editór: Rafael Ximenes de A. Belo
