OEKUSI, 24 Fevereiru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago de Fatima Lobato, hamutuk ho Sekretária Rejionál ba Edukasaun no Asuntu Sosiál, Inácia Tamele apoia nesesidade báziku ba Ema ho Defisiénsia (EhD) na’in-19 iha suku Costa, sub-rejiaun Pante Makasar.
Prezidente Autoridade RAEOA, dehan apoiu ne’e mezmu nato’on de’it maibé oferese ho fuan nu’udar domin ba maluk Ema ho Defisiénsia.
Notísia relevante:RAEOA selebra Loron Mundiál EhD “Unidu iha asaun hodi salva no alkansa objetivu”
“Imi hanesan defisiénsia, la signifika imi lakon kapasidade, balun matan aat, balun liman la funsiona ho di’ak, maibé imi mós nu’udar sidadaun timoroan liuliu Oekusi-oan, tanba ne’e imi presiza hetan apoiu husi Autoridade RAEOA, ida-ne’e hanesan domin ba ita bo’ot atu uza ba nesesidade uma-laran,” dehan Rogério Lobato iha ámbitu distribuisaun hala’o iha salaun Parókia igreja Numbei, Oekusi.
Iha biban ne’e, Prezidente Autoridade mós rekomenda ba parte Sekretária Rejionál Edukasaun no Asuntu Sosiál, atu kontinua rekolla kondisaun moris Ema ho Defisiénte ho kondisaun saida de’it nune’e bele simu apoia kada fulan.
“Sei bele ita apoia sira kada fulan, la’ós tinan mak foin apoia dala ida maibé Autoridade nia hakarak kada fulan maske oituan, maibé asaun ne’e hodi hamenus sira-nia susar uma laran, tanba balun forma ona família, ne’ebé ohin ita komesa ho apoia ne’e ba oin ita rekolla hotu Oekusi tomak atu kada fulan bele simu nesesidade bázika,” nia informa.
Iha fatin hanesan, Sekretária Rejionál ba Edukasaun no Asuntu Sosiál, Inácia Tamele, dehan apoiu ne’e nu’udar domin ba maluk Ema ho Defisiénsia sira.
“Autoridade RAEOA liliu parte edukasaun no sosiál sempre apoia mezmu la responde hotu imi nia preokupasaun maibé apoiu solidariedade husi Governu sempre iha ba maluk EhD, imi sei la mesak autoridade RAEOA hamutuk ho imi, ne’ebé ita resforsa atu bele simu kada fulan,” nia dehan.
Entretantu, apoia nesesidade bázika sira-ne’e mak hanesan, kada ema ida hetan foos saka ida ho ai-han komplementar sira seluk, hanesan susu, kota, ikan-lata, kafe no masin midar, mina goreng no seluk tan.
Notísia relevante:BIFANO apoia nesesidade bázika ba Ema ho Defisiénsia iha RAEOA
Jornalista: Abílio Elo Nini
Editór: Florencio Miranda Ximenes
