KOVALIMA, 04 Agostu 2025 (TATOLI)- Servisu Munisipál Edukasaun Kovalima liuhusi Departamentu Parke Eskolár rekolla hela dadus eskola sira ne’ebé menus mobiliáriu no fasilidade eskolar no rekursu umanu.
“Ami rekolla ona dadus ba eskola sira enfrenta problema menus mobiliáriu no profesór tanba tinan ne’e profesór balun tama ona lista reforma obrigatóriu balun mate no moras permanente”, Diretora Servisu Munisípiu Edukasaun Kovalima, Elda de Fatima, relata dadus ne’e ba jornalisra sira,iha Santa rosa ohin.
Ho problema ne’ebé mak eskola hasoru Departamentu parte eskolár daudaun-ne’e rekolla hela dadus husi eskola Bázika Centrál (EBC) 24, eskola sekundáriu Jerál no eskola Tékniku Vokasionál ne’ebé mak menus profesór, edifísiu no mobiliáriu.
Hafoin rekolla dadus servisu edukasaun Kovalima sei supmete pedidu ba nasionál, maibé molok ne’e mós submete ona pedidu ba nasionál kona-ba menus profesór ho mobiliáriu iha eskola sira.
Kona-ba problema referidu hanesan dirijente edukasaun iha tinan kotuk edukasaun submete ona pedidu, maibé ba tinan ne’e mós nafatin submete pedidu atu koloka manorin na’in bazeia ba nesesidade husi edukasaun Kovalima hodi koloka ba eskola sira.
Bazeia ba dadus totál profesór ne’ebé ativu hanorin iha munisípiu Kovalima hamutuk 1030 husi númeru ne’e iha 2025 mamorin na’in-130-resin mak tama iha lista reforma obrigatóriu no na’in-10 mak mate ona.
Jornalista:Celestina Teles
Editór:Florencio Miranda Ximenes
